"Temeke Tuko Tayari Kuendeleza Mahusiano" Mstahiki Meya Mtinika.

Posted on: April 20th, 2021

Mstahiki Meya Mh Abdallah Mtinika watatu kushoto akiwa katika picha ya pamoja na wageni kutoka mji Kati Zanzibar.

Halmashauri ya Manispaa ya Temeke  imetembelewa na wageni kutoka baraza la mji Kati Zanzibar.

Wageni hao ambao wapo katika ziara ya siku 2,   ziara yao imelenga  katika kuimarisha uhusiano baina ya baraza  la mji Kati na manispaa ya Temeke,ni Mwenyekiti wa baraza la mji Kati,Mheshimiwa Said Hassan Shaabani,Afisa TEHAMA bibi Salha Mansour na Mkaguzi wa ndani ndugu Salum Msham, ambapo wamepokelewa jana majira ya saa 11:45 Jioni  na Mstahiki Meya wa Manispaa ya Temeke Mheshimiwa Abdalah Mtinika.

Akizungumza wakati wa kikao kifupi kilichofanyika ofisini kwake majira ya saa 5:00 Asubuhi, kilichowahusisha  wageni hao,Kaimu Mkurugenzi,Afisa Utumishi na baadhi ya maafisa kutoka Kitengo cha Ukaguzi wa ndani na TEHAMa,Mhe. Mtinika amesema kwamba viongozi waliopita walikuwa na uhusiano mzuri na Baraza hilo,wakati huo ikiwa Halmashauri,na wao waliopo sasa watauendeleza uhusiano huo.

" Karibuni sana Temeke,sisi tuko tayari kukuza na kuuendeleza  uhusiano uliokuwepo,hasa katika uwekezaji.Nyie wenzetu mko vizuri katika utalii,mna fursa nyingi za uwekezaji ambazo Temeke tunaweza kuzitumia." Alisisitiza Mhe. Mtinika.

Kwa upande wake Mstahiki Meya wa Baraza la mji Kati amesema kwamba ziara hiyo ni muhimu sana kwao, kwani itawawezesha kujifunza mambo mbalimbali yatakayosababisha kulitoa Baraza mahali lilipo, na kulipeleka kuwa Manispaa.

"Waheshimiwa waliopita waliitoa Kati Halmashauri,ikawa Baraza la mji,Sisi tulioingia tunataka tutoke hapa,tuwe Manispaa,ili tuwe Manispaa kuna mambo inabidi tuyafanye,tumekuja ili tuboreshe uhusiano kati yetu,lakini pia kujifunza.Temeke mko mbali sana,sisi bajeti yetu ni Bilioni 1,wakati ninyi ni Bilioni 37,tofauti yetu ni kubwa sana.Ndio maana tumekuja,lengo la ziara hii ni kubadilishana mawazo,uzoefu,na kushirikiana zaidi katika masuala ya kiuchumi,ili na sisi tuwe Manispaa" Alisema Mhe. Shaabani.

Naye kaimu Mkurugenzi wa Manispaa ambaye pia ni Afisa Mipango,Takwimu na Ufuatiliaji wa Manispaa ndugu Deogratius Lukomanya, amepongeza ushirikiano uliopo baina ya Temeke na Kati,ambapo amesema kwamba wageni hao watajifunza mambo mengi,kwani Temeke inafanya vizuri katika ukusanyaji mapato,na masuala yote ya TEHAMA na Uhusiano.

Halmashauri ya manispaa ya Temeke ina uhusiano mzuri na baraza la mji Kati.Uhusiano huo ni wa muda mrefu, na wamekuwa wakitembeleana mara kwa mara,kwa lengo la kuimarisha uhusiano wao,pamoja na kujifunza.