‘‘Temeke Tunazungumzia Viwango Vingine’’Mkurugenzi .

Posted on: August 8th, 2019

Mkurugenzi  mtendaji wa halmashauri ya manispaa ya Temeke ndugu Lusubilo Mwakabibi ametoa rai kwa halmashauri nyingine  kufika, kuona na kujifunza teknologia inayopatikana ndani ya banda la manispaa ya Temeke.Ndugu Lusubilo ametoa rai hiyo jana  mara baada ya kutembea na kujionea mambo mbalimbali yanayofanyika katika banda la halmashauri yake.

Akizungumza katika mahojiano mafupi  Mwakabibi amesema “Temeke tumeingia katika mazingira ambayo ni ya kiwango kingine cha kuunga mkono juhudi za Mheshimiwa Rais wa jamhuri ya muungano wa Tanzania za kuhakikisha kwamba Tanzania inakuwa nchi ya viwanda.Tumewawezesha wajasiliamali wetu,sasa wanafanya vitu vikubwa.Halmashauri nyingine zimefanya mambo mazuri,lakini Temeke tumefanya kwa viwango vya juu.Karibu Temeke ujifunze na uone mambo makubwa.Sio kwamba ununue tu,lakini uchukue teknolojia tuliyonayo ,upeleke kwenye halmashauri yako’’.

Mwakabibi  ameonyesha kuridhishwa na kiwango cha ubora wa bidhaa za wajasiliamali ambapo  amesema kwamba wamefanya vizuri kwenye eneo la viwanda vidogo  vidogo, wanasindikika bidhaa za aina mbalimbali ,ufungashaji  wao pia ni mzuri sana kiasi ambacho mtu anapoziona anaweza kufikiri kwamba bidhaa hizo zimetoka katika nchi zilizoendelea.

Kadhalika Mwakabibi amesema kwamba  Temeke sasa wameingia katika eneo la viwanda ambapo katika banda la manispaa ya Temeke kipo kiwanda cha kutengeneza viatu  ambacho  wanauwezo wa kumpima mtu kiatu,kumtengenezea na akaondoka na viatu vyake vikiwa vimekamilika, jambo ambalo linaonyesha kwamba Temeke iko kwenye kiwango kingine.

Mwakabibi ameendelea kusema kwamba  ,wanataka viatu vinavyozalishwa na kiwanda hicho, visiishie  kuuzwa Temeke tu ,bali wanataka viende nje ya Tanzania.Amesema kama ambavyo Mhe. Rais ametangaza kwamba mkutano wa SADEC unafanyika hapa Tanzania, nchi 16 zitakuwepo hapa nchini kuanzia tarehe tisa,na tarehe 17 na 18 Marais wa nchi zote 16 watakuwepo,Temeke watatumia fursa hiyo kuhakikisha kwamba watakaokuja kwenye mkutano huo wanaondoka na viatu vinavyotengenezwa na kiwanda hicho  ,ili soko lake liweze kukua.

Halmashauri ya manispaa ya Temeke  imekuwa ikitumia asilimia kumi ya mapato yake ya ndani kuwawezesha wanawake, vijana na watu wenye ulemavu kiuchumi, ambapo katika siku za hivi karibuni mkazo umewekwa zaidi kwenye kuwapatia vitendea kazi.Kwa mtindo huo walengwa hao wameweza kujiunga katika vikundi ambapo vitendea kazi hivyo hupelekwa kwenye vikundi hivyo,kwa kuzingatia mahitaji  ambayo kila kikundi kimeyaainisha.Kupitia uwezeshaji huo, kiwanda cha kufyatua tofali, kiwanda cha viatu vimeweza kuanzishwa,na vingine vingi viko mbioni kuanzishwa.

........... MWISHO.........