TEMEKE YAFANYA KONGAMANO KUBWA LA FURSA ZA UWEKEZAJI

Posted on: December 15th, 2023

Na: Joanita Joseph -TMC Habari

Halmashauri ya Manispaa ya Temeke kwa kushirikiana na wadau mbalimbali leo Desemba 15, 2025 imefanya Kongamano la fursa za uwekezaji mahsusi kwa ajili ya kuwahafamisha wawekezaji, wafanyabiashara na wadau wa maendeleo uwepo wa fursa mbalimbali za kiuwekezaji zilizopo Temeke, kutoa elimu na kujadili mazingira juu ya uwekezaji ikiwa ni pamoja na kuweka maazimio baina ya wawekezaji na Manispaa ya Temeke kwa ujumla.

Akizungumza katika hotuba yake Mkuu wa wilaya ya Temeke Mhe. Sixtus Mapunda ambaye pia ni mgeni rasmi katika hafla hiyo amesema kuwa Serikali inahitaji nguvu ya uwekezaji ili iweze kukusanya mapato na kutoa huduma bora Kwa wananchi.

Mhe. Mapunda ametoa wito Kwa wawekezaji kutumia fursa za kiuwekezaji zilizopo Temeke na kuwahakikishia ushirikiano pamoja na mazingira bora yanayofaa kwa uwekezaji wa ndani na nje ya Nchi.

"Ujio wa bandari mpya utabadilisha jiji la Dar es salaam, kwahiyo ni fursa wana Temeke tunayo,Wekezeni Temeke. Msiogope Serikali yenu ni Serikali sikivu na Rais wa Jamhuri ya Muungano wa Tanzania Dkt. Samia Suluhu Hassan anawapenda na anawaalika karibuni sana kuwekeza katika Nchi yetu" alisema Mhe. Mapunda

Kwa upande wake Ndg. Elihuruma Mabelya, Mkurugenzi wa Halmashauri ya Manispaa ya Temeke amesema kuwa dhamira ya Manispaa ni kuongeza kasi ya uwekezaji katika sekta zote.

"Manispaa ya Temeke imesheheni fursa nyingi za kiuwekezaji na kiuchumi, tuna maeneo takribani 25 ambayo yanaweza kuchukuliwa kwa ajili ya uwekezaji kulingana na malengo ya Manispaa, sisi kama Manispaa tumejipanga vema, tupo tayari kushirikiana katika kuimarisha kipato cha wawekezaji, uchumi wa halmashauri na Nchi yetu kwa ujumla." Alisema Ndg. Mabelya

Kongamano Hilo limefanyika katika ukumbi wa DYCC Chang'ombe likiambatana na uzinduzi wa dawati la uwekezaji kwa ajili ya kuratibu shughuli za uwekezaji. Limehudhuriwa na taasisi mbalimbali ikiwemo TIC, TRA, TCCIA, NSSF,TPDC, TPSF, DCB Bank na kadhalika.