TEMEKE YAINGIAMTANDAO WA C40.

Posted on: February 3rd, 2022

Halmashauri ya manispaa ya Temeke siku ya Februari 02,2022 imeingia makubaliano ya kuingia katika mtandao wa C40 kupitia kundi la wasiokuwa wanachama wa C40 ('non CITIES C40 member') mara baada ya kutembelewa na uongozi wa C40 katika ofisi za halmashauri hiyo zilizopo wilaya ya Temeke.

Ameyasema hayo Mstahiki Meya wa halmashauri hiyo Mheshimiwa Abdallah Mtinika alipopokea ugeni huo kutoka katika Shirika la mtandao wa mameya inayoongoza takribani Miji 100 duniani inayoshirikiana kutoa hatua za haraka kukabiliana na mabadiliko ya tabia za nchi na changamoto mbalimbali lijulikanalo kama C40 CITIES.

Aidha Mhe. Mtinika amesema ugeni huo ukiongozwa na Mkurugenzi Mtendaji wa C40 CITIES Afrika Ndugu Hastings Chikoko kutoka Afrika ya Kusini pamoja na Afisa programu wake kuwa umeitembelea halmashauri ya Temeke kutokana na kuvutiwa na programu zake zinazofanywa huku wakitarajia kujenga mahusiano mazuri yenye malengo ya kujengeana uwezo wa kitaalam, mafunzo pamoja na kubadilishana uzoefu.

"Ujio wa shirika hili utaendelea kuisaidia Halmshauri ya Manispaa ya Temeke kwani itafungua zaidi milango ya kujulikana dunia nzima huku ikiwa na malengo ya kushirikiana na miji mengine kote Afrika na duniani kuona namna gani wanaweza kupambana katika mabadiliko ya tabia ya nchi ili dunia kuendelea kuwa sehemu salama ya kuishi". Alisema Mhe. Mtinika

Naye Mkurugenzi Mtendaji wa Afrika C40 CITIES Ndugu Hastings Chikoko amesema ujio huu una malengo ya kutekeleza programu ya kukabiliana na mabadiliko ya tabia ya nchi kwa kushikiriana na miji mengine duniani kuweza kupata suluhu, kukuza uwezo, kujifunza kutoka kwa kila mmoja juu ya sababu zinapelekea Mabadiliko hayo na athari zake duniani ili kuweza kukabiliana nazo.

Sambamba na hilo Ndugu Chikoko ameongezea kusema kuwa wameichagua Temeke katika Jiji la Dar es salaam kwakuwa wanatarajia kuandaa mpango wa utekelezaji wa hali ya hewa utaopelekea Manispaa zote kushiriki kutekeleza mpango huo ambapo Temeke ni Manispaa lengwa lakini pia kutokana na Mstahiki Meya wa Temeke amekuwa akitekeleza programu mbalimbali za C40 kwa mda mrefu ambapo uzoefu wake utasaidia kukamilisha programu za shirika hilo.

Kwa namna yake Ndugu Chikoko ameeleze kuwa Shirika la C40 linashuhulika na mambo mbali mbali ikiwemo masuala ya mafuriko, ukame, ulinzi wa vyanzo vya Maji, Nishati, Usafirishaji, na kutafuta namna za kukabiliana na changamoto zinazojitokeza kukwamisha maendeleo katika Miji mingi duniani.