Temeke Yajitosa Kumsaidia Mwanafunzi Aliyeshindwa Kwenda Shule kwa Kukosa Fedha

Posted on: August 22nd, 2019

Mkurugenzi wa manispaa ya Temeke Ndg. Lusubilo Mwakabibi akimpa maelekezo dada wa mwanafunzi Sara Rodgers Bi Rebeka Rodgers( Aliyesimama na Mkurugenzi) kabla kukabidhi fedha zilizochangwa kwa ajili ya kumuwezesha Sara kwenda shule.Aliyekaa mbembeni ya Rebeka ndiye Sara Rodgers.

................HABARI KAMILI ................

Mkurugenzi pamoja na wakuu wa idara na vitengo wa manispaa ya Temeke wamejitolea kuchanga fedha kiasi cha shilingi 1,720,000 kwa ajili ya mwanafunzi Sara Rodgers ambaye ameshindwa kwenda shule kwa kukosa fedha.Fedha hizo zimechangwa  leo , majira ya mchana ofisini kwa mkurugenzi wa Manispaa ya Temeke .

Akizungumza wakati akikabidhi fedha hizo mkurugenzi  wa manispaa ya Temeke  ndugu Lusubilo Mwakabibi amesema “Tumeitwa duniani kubadilisha maisha ya watu,haina maana kama sisi tuna maisha mazuri ,huku kuna watu wengine wanateseka,na uwezo wa kuwasaidia tunao.Kama huyu binti amefaulu vizuri,lakini ameshindwa kwenda shule kwa sababu ya kukosa fedha.Ni lazima tufanye kitu,tuguse maisha ya watu”.

Aidha Mkurugenzi Mwakabibi amesimamia utararatibu mzima wa mgawanyo wa fedha hizo kulingana na mahitaji ambapo amemkabidhi Sara kiashi cha shilingi 400,000 kwa ajili ya kununua mahitaji ya shule, amekabidhi kiasi cha shilingi 188,000 kwa Afisa ustawi wa jamii wa manispaa ya Temeke kwa ajili ya kumlipia Sara  ada na michango mingine ya shule kama ilivyoainishwa katika fomu ya kujiunga na shule,Amekabidhi kiasi cha 110,000 kwa dada wa Sara ambaye anaitwa Rebeka Rodgers kwa  ajili ya nauli na matumizi ya Sara atakapokuwa shule.

Katika fedha hizo pia, Mkurugenzi amemkabidhi Rebeka Rodgers kiasi cha shilingi 300,000 kwa ajili ya kukuza mtaji wa biashara yake.Na shilingi 722,000/= zilizosalia amemkabidhi Afisa wa benki ya CRDB  tawi la Temeke kwa ajili ya kumfungulia Sara akaunti.

Katika hatua nyingine Mwakabibi ameahidi kuwasaidia walezi wa Sara ambao ni Rebeka na mumewe  kwa kuwapa  mtaji wa biashara ili waweze kuendeleza maisha yao, na kuondokana na hali ngumu ya maisha inayowakabili sasa.

Sh

Sambamba na kuwapa mtaji ,amewataka kutafuta nyumba ya vyumba viwili ambavyo yeye pamoja na timu yake ya menejimenti watawalipia kodi ya mwaka mmoja,ili Sara atakapokuwa akirudi likizo awe na chumba chake cha kulala,tofauti na ilivyosasa ambapo analazimika kulala kwa jirani kutokana na dada yake  Rebeka kuishi kwenye chumba kimoja.

Mkurugenzi ameendelea kutekeleza kwa vitendo dhima ya manispaa ya Temeke ambayo ni kuinua maisha ya wakazi wake kwa kuwapa misaada mbalimbali ya kielimu,kiuchumi na kijamii.

............MWISHO.............