TIMU YA NETBALL TMK YAENDELEZA UBABE

Posted on: October 22nd, 2023

Na:Shalua Mpanda-TMC Dodoma

Timu ya wanawake ya mpira wa Pete(Netball) ya manispaa Temeke,imeendeleza wimbi la ushindi katika mashindano ya Shirikisho la Michezo la Serikali za Mitaa Tanzania(SHIMISEMITA) inayoendelea mjini hapa kwa kuishushia kipigo timu ya halmashauri ya Mji BARIADI kwa magoli 34-8.

Mchezo huo uliofanyika mapema Leo asubuhi katika uwanja wa Jamhuri mjini Dodoma umeifanya timu hii kuongoza kundi lao lenye timu nne baada ya jana kuifunga manispaa ya Kinondoni magoli 18-2.

Magoli ya timu ya Temeke yamefungwa na wachezaji hatari ambapo mfungaji kinara wa Timu hiyo Salma Pontia alifunga magoli 30 na mengine 4 yakipachikwa na Gema Gadu.

Katika michezo mingine iliyohusisha timu ya Temeke leo hii,timu ya mpira wa miguu imepoteza mchezo wake wa pili dhidi ya timu kutoka halmashauri ya Handeni mara baada ya kukubali kichapo cha magoli 2-0 huku pia timu ya mpira wa wavu(Volleyball) upande wa wanaume nayo ikipoteza mchezo huo dhidi ya timu kutoka jiji la Arusha.

Michezo hiyo inaendelea tena mchana huu ambapo timu ya Volleyball wanawake itakuwa na kibarua kigumu dhidi ya Kahama huku timu ya mpira wa mikono ya wanaume nayo ikiingia uwanjani kusaka rekodi.

Michezo ya SHIMISEMITA imefunguliwa Oktoba 18,2023 huku ikishirikisha timu kutoka halmashauri zote za miji,manispaa na wilaya zote nchini ambapo yanatarajiwa kufungwa rasmi Oktoba 30,2023.