TPA YAKABIDHI VITANDA 15 KWA AJILI YA KINAMAMA TEMEKE HOSPITALI

Posted on: June 1st, 2023

Na: Sweetbetter Njige

Leo Juni 01,2023 kaimu mkurugenzi wa mamlaka ya bandari Dar es salaam ndugu Mrisho Mrisho amekabidhi jumla ya vitanda 15 vyenye thamani ya shilingi 25,000,000/= kwa mkuu wa wilaya ya Temeke mheshimiwa Mwanahamisi Munkunda  ambavyo vitatumika katika wodi za kinamama.

Akizungumza baada ya makabidhiano hayo yaliyofanyika katika viwanja vya hospitali ya Temeke na kuhudhuriwa na viongozi mbalimbali wa Chama na Serikali, mhe. Manahamisi Munkunda alisema vitanda hivyo ni faraja kwa wanawake watakaofika kujifungua hospitalini hapo.

"Tumefarijika kupokea vitanda hivi, kwa siku wanawake wanaojifungua hapa kwa rufaa ni 20 mpaka 30, uwepo wa vitanda hivi utawezesha wote kupata huduma kwa wakati mmoja bila kusubiriana na hii inakweda kuthibitisha dhana ya uboreshaji na utoaji huduma mzuri kwa wagonjwa"

Akizungumza kwa niaba ya mkurugenzi mkuu wa mamlaka ya usimamizi wa  bandari kaimu mkurugenzi Ndg. Mrisho alisema ni furaha kwa mamlaka hiyo kurudisha kwa jamii hasa katika sekta ya afya kwa kutoa vitanda bora kwa ajili ya kuwezesha zoezi zima la kujifungua kwa kina mama.

Kwa upande wake mganga mkuu wa hospitali hiyo daktari Joseph Kimaro alisema

"Tunawashukuru Bandari kwa msaada huu wa vitanda 15 unaokwenda kupunguza changamoto ya vitanda pale wodi ya kujifungua, hii inaakisi ile dhana ya Mhe. Rais ya "Pamoja Tuwavushe Salama" na baada ya kupatikana kwa vitanda tunaamini tutaongeza uhitaji wa huduma"

Mamlaka ya usimamizi wa bandari inaendelea kushirikiana na taasisi mbalimbali za Serikali na siziso za Kiserikali katika kuhudumia Wananchi wa wilaya ya Temeke kwa kurudisha kwa jamii sehemu ya faidha inayopatikana.