"TUKIUNGANISHA NGUVU YA PAMOJA, DAR YENYE MAFANIKIO INAWEZEKANA" RC MAKALA.

Posted on: June 15th, 2021

Mkuu wa Mkoa wa Dar es Salaam Mhe Amos Makala amesema hayo wakati wa kikao kazi alichokifanya kati yake na waheshimiwa madiwani, wakuu wa Idara na vitengo, na watendaji wa Kata katika ukumbi wa mikutano wa Manispaa Temeke, Dar es Salaam.

Akiongea katika kikao hicho Mhe Mkuu wa Mkoa amebainisha matarajio ya mkoa huo huku akiweka wazi vitendea kazi vya kufikia matarajio hayo ya mkoa ni "Ilani ya CCM" .

Mhe Amos Makala ameutaka uongozi wa Wilaya ya Temeke kuhakikisha yafuatayo yanapewa kipaumbele:

Kwanza kabisa suala la Usalama liwe ni ajenda ya kudumu, jambo hilo la usalama lianzie ngazi ya mtaa kwa sababu uhalifu wa aina yoyote unaanzia huko.

Vilevile hali ya Usafi, Mhe Mkuu wa Mkoa amesema haridhishwi na hali ya usafi katika Wilaya za Mkoa wa Dar es Salaam.

"Nimeandaa mpango mkakati wa kuweka mkoa wa Dar es Salaam safi na nitauleta kwenu ujadiliwe na waheshimiwa madiwani tuwe na uelewa wa pamoja" Alisema Mhe Makala.

Amesisitiza wakandarasi wa usafi wapewe wale wenye uwezo, kazi hiyo isitolewe kindugu, kama ni mkandarasi basi awe na uwezo na vifaa vya kutosha vya kufanyia usafi katika eneo husika.

Sambamba na hilo pia suala la miradi ya maendeleo, Mkuu wa Mkoa amewataka waheshimiwa madiwani kusimamia miradi ya maendeleo inayotekelezwa katika maeneo yao.

Kwa upande  wa mapato Mkuu wa Mkoa ameitaka Manispaa kuendelea na historia nzuri ya ukusanyaji wa mapato ili kuweza kutekeleza kwa ufasaha miradi ya maendeleo.

Aidha Mkuu wa Wilaya Mhe Godwin Gondwe amemuhakikishia Mkuu wa Mkoa mambo yote aliyoelekeza yatatekelezwa kwa nguvu zote ili kufikia matarajio ya Mkoa.

Naye Mstahiki Meya wa Manispaa Mhe Abdallah  amempongeza Mkuu wa mkoa kwa kuja na mikakati mizuri yenye tija na kuleta ustawi kwa jamii, ameahidi yeye pamoja na waheshimiwa madiwani kuwa pega kwa bega ili kufikia matarajio yaliyobainishwa na Mkuu Mkoa kwa maendeleo ya Temeke na Dar es Salaam kwa ujumla.