''TULINDE MASLAHI YA WANANCHI'' WAZIRI MKUU KASSIM MAJALIWA

Posted on: August 18th, 2021

Waziri mkuu Mh. Kassim Majaliwa Kassim ameambatana na waziri wa TAMISEMI Mhe. Ummy Mwalimu, mkuu wa mkoa wa Dar es Salaam Mhe. Amos Makalla,mkuu wa wilaya ya Temeke Mhe. Jokate Mwegelo na mkurugenzi wa Manispaa ya Temeke Ndg. Elihuruma Mabelya katika ziara ya ukaguzi wa miradi mbalimbali ya maendeleo inayotekelezwa katika wilaya ya Temeke.

Katika ziara hiyo Mhe. Majaliwa amewasisitiza watendaji kuhakikisha miradi ya maendeleo inafanyika kwa usahihi kulingana na thamani ya fedha ya serikali inayotokana na kodi za wananchi ili kuhakikisha maendeleo yanapatikana katika kiwango bora.

"Nitacheza na mtu yoyote anayefanya mchezo,kuweni makini na hawa washauri wenu, ni lazima tuwe makini, sisi tupo kwa niaba ya wananchi lazima tulinde maslahi ya wananchi, lazima tuhakikishe huduma hizi zinawafikia wananchi kwa gharama halisi, sio kwa kutengeneza gharama" alisema Waziri Mkuu.

Katika ziara hiyo Mhe. Majaliwa amewaelekeza watendaji kuwa barabara zote mpya zitakazojengwa ziwekwe taa ili kuongeza usalama kwa wananchi.

"Na tunataka barabara za lami tunazojenga ziwekwe taa, hatuwezi kujenga barabara tukaacha giza tunauwezo wa kusambaza taa barabara zetu zote".

Aidha Mhe. Majaliwa amewataka watendaji kuzingatia mahitaji ya wananchi kabla ya kufanya maamuzi ya kufanya miradi.

"Leteni miradi inayonufaisha wananchi,na sio kundi fulani, mipango inayotokana na mahitaji ya eneo, haina maana kujenga majumba badala ya kujenga kituo cha mabasi,haina maana" Alisema Waziri Mkuu.

Katika hatua nyingine Mhe. Majaliwa amewashukuru wananchi wa Dar es Salaam, waandishi wa Habari kwa kazi nzuri ya kuhabarisha wananchi wa Tanzania.