''TUMEJIRIDHISHA, MRADI TUMEIONA'' KAMATI YA SIASA

Posted on: August 12th, 2021

Mkuu wa wilaya ya Temeke Mhe. Jokate Urban Mwegelo leo Agosti 11,2021 ameambatana na Wajumbe wa kamati ya Siasa wilaya ,Meya na viongozi wengine wa Serikali kutembelea na kukagua miradi ya maendeleo, ikiwa ni utekelezaji wa ilani ya uchaguzi ya Chama Cha Mapinduzi (CCM) ya mwaka 2020-2025 .

Kamati hiyo iliyoongozwa na katibu wa Siasa na Uenezi Wilaya ya Temeke ndugu Ally Mussa Kamtande imekagua miradi mbalimbali ikiwemo miradi ya ujenzi wa vyumba vya madarasa,maabara, ofisi ya kata ya Buza, miradi ya barabara na miradi inayotokana na mikopo ya 10% ya mapato ya ndani ya Manispaa .

Ziara hiyo ya siku 2, inafanyika ili kujiridhisha kama serikali inatekeleza ilani ya Uchaguzi kuleta maendeleo kwa Wananchi.

"Kwa mujibu wa Chama Cha Mapinduzi,katika kusimamia utekelezaji wa Ilani, wakati wa usimamiaji wa Ilani huwa hatubaki maofisini, bali tunapita maeneo husika kwa ajili ya kukagua na kujiridhisha je miradi ipo na imetekelezwa kwa kiwango kinachotakiwa? Lakini hapa tumejiridhisha,miradi tumeiona"

Akizungumzia faida za miradi hiyo kwa maendeleo ya Wananchi ndugu Kamtande amesema
"Kwa mfano mradi wa hii shule ya Mbande-Kisewe kwa namna moja ama nyingine unaenda kupunguza msongamano wa wanafunzi madarasani, lakini pia unatoa fursa hata Wanafunzi wengine kuhamia"

Katika hatua nyingine mkuu wa Wilaya ameishukuru kamati hiyo kwa kufanya ziara hiyo, na kuahidi kuwa maoni,ushauri na changamoto ndogo ndogo zilizobainika zitafanyiwa kazi ili kuhakikisha maendeleo yanafanyika kwa wakati na kwa usahihi.

Moja wapo ya miradi inayotokana na mikopo ya 10% iliyokaguliwa na kamati hiyo, ni kikundi cha vijana wanaojishughulisha na utengenezaji wa samani (Mwela Group),ambapo wajumbe wa kamati hiyo wamewaahidi vijana hao kuwa CCM itasaidia kuwaendeleza kielimu kwa kuwafadhili kusoma masomo ya ufundi stadi ili kuwawezesha kufanya kazi kwa ufasaha na kuendana na soko la ushindani.