"TUNAENDELEA KUDUMISHA USAWA WA KIJINSIA NA UWEZESHAJI WANANCHI KIUCHUMI" KATIBU TAWALA DSM

Posted on: March 8th, 2022

Katibu tawala mkoa wa Dar es salaam Ndugu Hassan Rugwa amewataka Wananchi kudumisha usawa wa kijinsia ili kuleta maendeleo Nchini.

kauli hiyo ameitoa leo Machi 8,2022 katika uwanja wa Uhuru jijini Dar es salaam, wakati wa maadhimisho ya siku ya Wanawake duniani.

Katibu Tawala huyo amesema kuwa serikali ya Awamu ya Sita inayoongozwa na mheshimiwa Samia Suluhu Hassan, imejikita katika kuhakikisha Tanzania ina maendeleo kwa kulipa kipaumbele suala la haki na usawa, huku wakifanya jitihada za kuwawezesha Wanawake kushiriki katika shughuli  mbalimbali hususani za kijamii,kiafya na kiuchumi.

Aidha ametoa wito kwa Wananchi kudumisha mshikamano na usawa katika familia zao ili kuleta maendeleo katika ngazi ya jamii,jambo ambalo litasababisha Taifa kuwa na kizazi chenye usawa na maendeleo.

Kwa upande wake katibu tawala wilaya ya Temeke Bi. Bupe Mwakibete ametoa shukrani kwa viongozi na wananchi walioshiriki katika Maadhimisho hayo, huku akiwataka kushirikiana kwa pamoja kuunga mkono juhudi za serikali ya Awamu ya Sita ili kuleta maendeleo.

Machi 08, kila mwaka ,dunia huadhimisha siku ya Wanawake.Kauli mbiu ya maadhimisho hayo kwa mwaka huu 2022, ni Kizazi cha haki na usawa kwa maendeleo endelevu.