''TUNAFELI KWA KUTOJIWEKEA MUDA''- MKURUGENZI TEMEKE

Posted on: November 29th, 2021

Kutokuwa na muda maalumu wa kutekeleza dhamira kwa mambo tunayojiwekea ndio sababu kuu ya kushindwa kufikia malengo.

Hayo yameelezwa na Mkurugenzi wa manispaa ya Temeke Ndugu Elihuruma Mabelya alipozungumza na wanafunzi wa Chuo cha Uandishi wa Habari na Utangazaji Fanikiwa cha jijini Arusha walipofika kumtembelea ofisini kwake, Jumamosi, Novemba 27,2021 wakati wa ziara yao ya kimasomo mkoani Dar es salaam.

Amesema kuwa ili kuweza kufikia malengo , haipaswi tu kuwa na dhamira na maono, bali pia kuwa na muda maalum wa kuyatimiza malengo hayo.

"Mimi binafsi nilisema nitakapofikisha miaka arobaini lazima niwe kiongozi mwandamizi sehemu fulani,lakini achilia mbali kuweka muda wa malengo, kusoma kwa bidii na kuwa na tabia njema ni lazima".Alisema Mkurugenzi huyo.

Kwa upande wake mkufunzi na mkuu wa msafara huo Bwana Onesmo Elia Mbise alimshukuru Mkurugenzi huyo kwa kutenga muda wake kuzungumza na wanafunzi hao,ambapo anaamini kwamba mazungumzo hayo yatakuwa chachu ya kufanya vizuri katika masomo yao.

Ziara ya siku 3 ya wanafunzi hao 28 na wakufunzi wao watatu ilihitimishwa siku hiyo ya Jumamosi,ambapo awali walitembelea vituo vya habari vya Clouds na Wasafi.