TUNASHUKA KUJA KUFANYA KAZI HUKU ILI MSHUHUDIE KUWA TUNATEKELEZA-MEYA MTINIKA

Posted on: April 11th, 2025

Na: Sweetbetter Njige, TMC Habari

Mstahiki Meya wa Halmashauri ya Manispaa ya Temeke Mhe.Abdallah Mtinika ameongoza Hafla ya Utiaji Saini Mikataba miwili ya Ujenzi wa Shule Mpya kwa Mfumo wa ghorofa Chamazi-Mwembebamia na Ujenzi wa Bweni la Wavulana Shule ya sekondari Kibasila.

Akizungumza katika halfa hiyo iliyohudhuriwa na viongozi mbalimbali ikiwemo Diwani wa Kata ya Chamazi Mhe. John Gama, Mstahiki Meya amesema

“Lengo la kushuka huku ni ili muone kuwa tunatekeleza Sera na kila tunachozungumza, tumekuja na Mkandarasi kabisa ili aone hali halisi, uharaka na uhitaji wa Wananchi na vijana wetu wanaopata shida kwenda mbali na hapa.

“Nitoe pongezi kwa Mkurugenzi wa Manispaa, anafanya kazi kubwa kwa spidi yetu, lakini pia nimpe maelekezo sisi tuna mpango wa kuanza ujenzi haraka na kumaliza haraka ili watoto wetu waingie madarasani”

Akitoa salamu kwa Wananchi Diwani wa kata ya Chamazi Mhe. John Gama amemtaka Mkandarasi na Msimamizi wa Mradi kuhakikisha ajira zisizohitaji ujuzi mkubwa zinabaki kwa wakazi wa eneo husika.

“Tunajua mkandarasi utakuja na wataalam wako kutoka huko lakini hapa tunao vijana wanaosubiri kupata fursa ya ajira kupitia mradi huu, kwa kufuata mchakato sahihi tukuombe vibarua visivyohitaji ujuzi vichukuliwe na vijana wa hapa Mwembebamia pamoja na shughuli za mama lishe na hata walinzi kwakua wanalifahamu zaidi eneo hili”. Alisema Mhe. Gama

Mikataba hiyo iliyosainiwa Aprili 10,2025 inajumuisha ujenzi wa shule mpya ya ghorofa katika eneo la Mwembebamia itakayogharimu shilingi bilioni 1,748,026,090.00 na ujenzi wa bweni la wavulana (ghoÙrofa mbili) katika shule ya sekondari Kibasila kwa thamani ya shilingi bilioni 1,057,210,852.00 miradi yote ikitekekezwa na kampuni za wazawa.