UINGEREZA YATANGAZA NEEMA ELIMU TANZANIA.

Posted on: May 12th, 2021

Serikali ya Uingereza imesema itaendelea kuisaidia Tanzania katika sekta ya elimu na kuboresha miundombinu yake ili kuwezesha watoto hasa wa kike waweze kusoma kwenye mazingira bora.

Ahadi hiyo imetolewa na Waziri wa serikali ya Uingereza anayeshuhulikia masuala ya Afrika Bw. James Duddridge alipoitembelea shule ya sekondari ya Kibasila iliyopo manispaa ya Temeke mkoani Dar es salaam.

Akiwa shuleni hapo kwenye ziara ya kukagua majengo ya shule hiyo kongwe hapa nchini ambayo yamefanyiwa ukarabati mkubwa kwa msaada wa serikali ya Uingereza ikishirikiana na wizara ya Elimu Tanzania,Waziri huyo aliipongeza serikali ya kwa kusimamia zoezi hilo na kuahidi kuendelea kuunga mkono juhudi za serikali ya Tanzania ili kuboresha elimu.

"Ni matumani yangu kuwa maboresho haya yatakuwa chachu kwa watoto wetu hasa wakike kuongeza juhudi katika masomo yao na kufanya vizuri".Alisema Bw. James

Kwa upande wake waziri wa Elimu Sayansi na Teknolojia Mh.Joyce Ndalichako amesema Serikali kwa kushirikiana na wadau mbalimbali wataendelea kuboresha elimu nchini na wana mpango wa kujenga shule nchi nzima ili kuhakikisha kila mwanafunzi anapata nafasi ya kusoma.

"Tuna mpango wa kujenga shule za bweni katika  kila mkoa nchi nzima ili kuwezesha watoto wetu hasa wa kike wawe salama".Aliongeza Waziri Ndalichako.

Waziri huyo wa Uingereza anayeshughulikia masuala ya Afrika atakutana na kufanya mazungumzo na Rais wa Tanzania Mh.Samia Suluhu Hassan baadae hii leo na kesho atasafiri kuelekea Zanzibar ambapo huko pia atakutana na Rais Dkt.Hussein Mwinyi.

ReplyForward