"UKWEPAJI KODI NA UCHAFUZI WA MAZINGIRA SASA UWE HISTORIA" MKURUGENZI MWAKABIBI.

Posted on: January 27th, 2021

Mkurugenzi wa manispaa ya Temeke Ndg Lusubilo Mwakabibi ametangaza kiama kwa wale wote wanaokwepa kulipa kodi na tozo mbalimbali zinazotozwa na Manispaa pamoja na uchafuzi wa mazingira katika maeneo yote ya Manispaa.

Ameyasema hayo leo wakati akiongaea na waandishi wa habari katika ukumbi wa mikutano wa Manispaa makao makuu Jijini Dar es salaam.

Akiongea juu ya uchafuzi wa mazingira Bwana Mwakabibi ameonyesha kukerwa na uchafu katika miundo mbinu ya barabara ambayo serikali imetumia gharama kubwa kuijenga na kwa bahati nzuri kwa sasa Temeke imezungukwa na barabara za lami hadi mitaani tena barabara hizo zina taa na zinavutia.

"Ni kwa nini sasa mwananchi wa Temeke au kutoka sehemu nyingine atupe taka ovyo au haoni umuhimu wa kufanya usafi katika eneo lake hali hiyo kwa Temeke haivumiliki" alisema Mwakabibi.

Mkurugenzi wa Manispaa Ndg Lusubilo Mwakabibi akitoa maagizo kwa wananchi wa Temeke kupitia  vyombo vya habari katika ukumbi wa Manispaa (Iddy Nyundo)

Ameweka bayana kwamba sheria zipo wazi, mfano sheria ya mazingira ya mwaka 2004 sura namba 288 kifungu 89 inayohusu sheria ya udhibiti wa uchafuzi wa mazingira imetamka mtu yeyote atakayekiuka ametenda kosa, na iwapo atapatikana na hatia,adhabu kali itatolewa dhidi yake ikiwemo kulipa faini ya Tsh 50,000/= au kifungu kisichopungua miezi 12 jela au vyote kwa pamoja.

Sambamba na hilo kwa upande wa wakwepa kodi na tozo mbalimbali zinazotozwa na Halmashauri hawavulimiki tena, ifahamike kuwa maendeleo yoyote yanayofanyika katika Manispaa yanatokana na kodi ambazo mwanatemeke anatakiwa kulipa.

Mfano mzuri hivi sasa Manispaa ya Temeke inajenga vyumba vya madarasa zaidi 91 fedha za utekelezaji wa ujenzi huo ni kutoka katika makusanyo ya ndani ambapo upatikanaji wa mapato hayo ni lazima kodi zilipwe.

Aidha Mkurugenzi wa Manispaa ametoa rai kwa wale wote wanaofanya biashara Temeke iwe ni  kwenye kizimba, maduka ya jumla na rejareja kuhakikisha wanalipa kodi na tozo zingine zinazotozwa na Manispaa.

''Kwa ujumla katika suala la usafi na ulipaji kodi kuanzia sasa iwe namba moja kwa kila mtu ndani Manispaa ya Temeke  kama kauli yetu inayotumika siku zote ya "Temeke ya Viwango" na Manispaa imejipanga vizuri''.Alisisitiza  Mwakabibi.