UONGOZI DCB BANK WAFIIKA TEMEKE

Posted on: August 12th, 2024

Na: Joanita Joseph - TMC Habari

Uongozi wa Benki ya Biashara ya Dar es salaam (DCB) ukiongozwa na Mkurugenzi Mkuu wa Benki hiyo Ndg. Sabasaba Moshingi leo Agosti 12, 2024 wametembelea Ofisi za Manispaa ya Temeke na kukutana na Menejimenti ya Manispaa, Lengo likiwa ni kujadili mikakati ya biashara, kuboresha mahusiano na ushirikiano baina ya Manispaa na Benki hiyo.

Akizungumza katika kikao na Menejimenti Mkurugenzi Mkuu wa Benki hiyo Ndg. Moshingi amesema

"Manispaa ya Temeke ni Manispaa kubwa niwaombe tushirikiane tuifanye Benki yetu pia nayo iwe kubwa ikiwemo kutuzingatia katika maamuzi mbalimbali ya kibiashara ambayo kama Manispaa mnaweza kuyafanya, DCB tumekuwa tukirudisha kwa jamii mfano hivi karibuni tumechangia ugawaji madawati ya wanafunzi katika manispaa zote jijini, ni matamanio yetu tufanye zaidi niwaombe tushirikiane kuikuza DCB iIi tuweze kurudisha zaidi kwa jamii. Benki hii ni mtoto wenu ni ya kwenu" alisema Ndg. Moshingi

Nae Kaimu Mkurugenzi wa Manispaa ya Temeke Ndg. Yahya Madenge kwa niaba ya Menejimenti amewashukuru Viongozi wa Benki hiyo kwa kuona umuhimu wa kufika Temeke huku akiahidi Menejimenti kwa kushirikiana na Baraza la Madiwani kwenda kufanyia kazi mambo waliyoyazungumza kikaoni hapo.

Benki ya Biashara ya Dar es salaam(DCB) ilianzishwa mnamo mwaka 2002 ikilenga kuwapatia mitaji Wananchi wenye kipato cha chini na cha kati kwa ajili ya kuanzisha na kuendeleza biashara zao.

Ikumbukwe kuwa Halmashauri ya Manispaa ya Temeke ni moja ya wanahisa waanzilishi wa DCB Bank ambapo ina umiliki wa 3.5% katika Benki hiyo.