UWEKEZAJI BANDARI YA DAR ES SALAAM KUNUFAISHA WENYE BANDARI KAVU (ICD)

Posted on: August 4th, 2023

Na: Joanita Joseph

Mkuu wa Wilaya ya Temeke. Mheshimiwa Mobhare Matinyi, tarehe 03/08/2023 alifanya ziara ya kukagua shehena inayohudumiwa na bandari kavu (Inland Container Depot - ICD) ya Harpended Explorer Scout Unit (HESU) iliyopo katika kata ya Miburani, wilayani Temeke.

Katika ziara hiyo aliambatana na mbunge wa jimbo la Temeke Mhe. Dorothy Kilave, Katibu Tawala wa Wilaya ya Temeke Nicodemas Tambo, Katibu wa CCM wa Wilaya ya Temeke, George Sayi, pamoja na Mwenyekiti wa Mtaa wa Miburani, Abeid Mvuma.

Akizungumza katika ziara hiyo, Mkuu huyo wa Wilaya alisisitiza ushirikiano baina ya serikali na wawekezaji kwani uwekezaji unaotarajiwa kufanywa utaboresha zaidi bandari ya Dar es salaam na kuiwezesha kuhudumia takribani tani milioni 38 za mizigo ifikapo mwaka 2030.

"Ubora wa huduma ya bandari hii umetokana na uamuzi wa Mh. Rais Dkt. Samia Suluhu Hassan kununua mitambo mitatu ya kupakua na kupakia makasha ya mizigo (Ship to Shore Gantry - SSG) ambapo mmoja una thamani ya shilingi za Tanzania bilioni 40 hadi 50.

Mhe. Matinyi alieleza kuwa uwekezaji huu utasaidia kuhudumia nchi jirani kwa ukamilifu akizitaja Uganda, Rwanda, Jamhuri ya Kidemokrasia ya Kongo (DRC), Burundi, Zambia, Malawi, Zimbabwe na hivi sasa hata Msumbiji, Komoro isiyokuwa na bandari kubwa na Sudan Kusini.Mhe. Matinyi alisema nchi hizo kwa mwaka zina shehena ya jumla ya zaidi ya tani milioni 70. Hivi sasa sehemu ya shehena hii inahudumiwa na bandari za Mombasa, Beira, Maputo, Walvis Bay na Durban.

Kati ya tani milioni 21.27 ambazo bandari ya Dar es Salaam ilizihudumia mwaka 2022/23 ni tani milioni 8.5 tu ndizo zilizotoka katika nchi hizi.

"Mipango ya baadaye ya bandari ni kuboresha magati namba 8 hadi 11; kuhamisha kituo cha kupokelea mafuta na gesi kutoka Kurasini kwenda Kigamboni pamoja na kuongeza magati namba 12 hadi 15.

Awali serikali ilishatumia jumla ya dola za Marekani milioni 420 kujenga yadi namba 5 hadi 7 zenye uwezo wa kutunza makasha 10,000; kutanua na kuongeza kina cha mlango bahari wa kuingilia bandarini, kujenga gati namba 0 lenye urefu wa mita 320 na eneo la kutunza magari 6,000; kuongeza kina cha magati namba 1 hadi 7 kutoka mita 7 hadi 14.5 pamoja na upana wake kwa mita 15.

Mhe.Matinyi amefanya ziara hii ikiwa ni moja kati ya malengo yake ya kutembelea maeneo yote yanayojishughulisha na shughuli za kiuchumi wilayani Temeke.