VYUMBA 10 VYA MADARASA KUKARABATIWA NA OFISI MOJA KUJENGWA SHULE YA MSINGI KILAMBA

Posted on: March 10th, 2021

Vyumba kumi (10) vya madarasa kukarabatiwa na ofisi moja (1) mpya ya walimu kujengwa katika shule ya msingi Kilamba iliyoko Kata ya Charambe Wilaya ya Temeke Mkoani Dar es Salaam.

Hayo yamejiri jioni ya jana wakati Mkuu wa wilaya ya Temeke Mhe Godwin Gondwe akiwa ameambatana na Mkurugenzi wa Manispaa Ndg Lusubilo Mwakabibi pamoja na wataalam wengine kutoka Idara ya Elimu Msingi walipozuru katika shule hiyo.

Akiwa katika shule hiyo Mkuu wa Wilaya amesema ziara hiyo ni muendelezo wa ziara za mara kwa mara zenye lengo la kutembelea, kukagua na kuona namna ya kuboresha miundo mbinu ya Elimu katika shule za msingi na Sekondari ndani ya Wilaya ya Temeke.

“Kwa shule hii ya Kilamba kuanzia wiki ijayo vyumba vya madarasa 10 vitakarabatiwa na ujenzi wa ofisi moja ya walimu ili vijana waweze kuwa na mazingira mazuri tumeshajenga madarasa 54 katika maeneo mengine na tunaongezea mengine 60 jumla yatakuwa 114 kwa kutumia fedha za ndani” Alisema Mhe Gondwe.

Sambamba na hilo amewataka walimu kuendelea kufundisha kwa bidii pia wanafunzi wasome kwa bidii na vijana wakike wajitambue wasikubali kurubuniwa na mtu yeyote siku zote elimu kwao iwe kipaumbele namba moja.

Katika suala la michezo amewataka wanafunzi kuzingatia, wawe katika makundi ya michezo mbalimbali ili kuweza kuibua vipaji vya michezo ambavyo baadae vitawapatia ajira lakini pia elimu ya kujitegemea “EK” ukiachana elimu wanayofundishwa darasani.

Kwa upande wa mkurugenzi wa Manispaa amesema Manispaa imejipanga kuhakikisha inaboresha miundombinu ya shule za msingi na Sekondari katika Manispaa ya Temeke. 

“Ndio maana kupitia ziara ya leo shule hii sasa ya Kilamba itakarabatiwa  vyumba vya madarasa 10 na ofisi moja ya walimu itajengwa , tayari nimesha muagiza muhandisi wa Manispaa kuanza kazi hapa mapema wiki ijayo” Alisema Mwakabibi

Vilevile Mwalimu Mkuu shule ya Msingi Kilamba Mwl Leah R. Masaba amemshukuru Rais wa Jamhuri ya Muungano wa Tanzania Dkt John Pombe Magufuli kwa namna anavyoboresha miundo mbinu ya elimu, pia amemshukuru Mkuu wa Wilaya na Mkurugenzi wa Manispaa kwa kuhaidi kukarabati madarasa 10 na kijenga ofisi moja ya walimu.