WAFANYAKAZI KIWANDA CHA NONDO MBAGALA WALIA NA MAZINGIRA MAGUMU YA KAZI

Posted on: December 21st, 2022

Na:Shalua Mpanda-TMC

Baadhi ya wafanyakazi wa kiwanda cha kutengeneza nondo cha A.M Steel & Iron Mills kilichopo Mbagala wilayani Temeke wamelalamika kutokuwa na mazingira salama ya kufanyia kazi.

Wakizungumza na Mkurugenzi wa manispaa ya Temeke ndugu Elihuruma Mabelya ambaye aliambatana na Mstahiki meya wa manispaa hii Mhe.Abdallah Mtinika wakati wa ziara ya kushtukiza walioifanya kiwandani hapo leo,wamesema mazingira wanayofanyia kazi ni hatarishi.

Mmoja wa wafanyakazi kiwandani hapo amewaeleza viongozi hao kuwa sehemu kubwa ya kazi zinazofanywa kiwandani hapo hutumia moto mkali lakini hawana vifaa vya kuwakinga na joto hilo kali hali inayoweza kuhatarisha afya zao.

Akizungumza mara baada ya kukagua kiwanda hicho,Mstahiki meya Mtinika ameonesha kusikitishwa na mazingira ya kazi katika kiwanda hicho na kuelekeza mamlaka husika kuhakikisha hatua stahiki zinachukuliwa ili kuokoa maisha ya wafanyakazi hao.

" Leo tumekuja hapa baada ya kupata malalamiko ya muda mrefu,kwa kweli tuliyoyakuta ni mambo ya hatari,mazingira ya kazi si mazuri hata ukitazama wafanyakazi hawana vitendea kazi wanavaa kandambili,hii hali imenisikitisha".Alisema Mhe.Mtinika.

Naye mkurugenzi wa manispaa ya Temeke Elihuruma Mabelya amesema kiwanda hicho kimekiuka taratibu za uendeshaji huku akisisitiza kuwa Serikali inapenda uwekezaji kwa kuwa unawezesha kukusanya kodi lakini kodi hiyo isitoke kwenye mazingira yanayoumiza wananchi.

Mbali na mazingira yasiyo rafiki kwa wafanyakazi, Viongozi hao wamebaini uharibifu na uchafuzi wa Mazingira kiwandani hapo ambapo moshi unaotokana na shughuli za uzalishaji wa nondo umekuwa ukitoka nje na kuathiri wanaozunguka eneo hilo.

Licha ya kazi zinazofanyika kiwandani hapo kutumia kiwango kikubwa cha moto lakini wafanyakazi wa kiwanda hicho wamekutwa wakifanya kazi zao bila kuwa na kinga za mikono(gloves),viatu vigumu wala kofia ngumu.

Ziara hiyo ambayo iliwajumuisha wataalamu wa mazingira kutoka Manispaa ni matokeo ya kauli ya Mhe.Rais Dkt.Samia Suluhu Hassan ya kuwataka viongozi kwenda kutatua kero na changamoto za Wananchi.