WAMACHINGA MBAGALA KUPANGIWA MITAA MAALUM YA KUFANYIA BIASHARA

Posted on: September 21st, 2023

Na:Shalua Mpanda- TMC Habari

Uongozi wa wilaya ya Temeke umepanga mitaa maalumu ya kufanyia biashara kwa wafanyabiashara ndogondogo(wamachinga) wanaofanya shughuli zao maeneo yasiyo rasmi hasa katika eneo la Mbagala Rangitatu.

Hayo yamebainishwa na mkuu wa wilaya ya Temeke mheshimiwa Mobhare Matinyi alipokuwa akizungumza na wafanyabiashara hao Septemba 21,2023.

Mhe.Matinyi amesema nia ya Serikali ya awamu ya sita inayoongozwa na Mhe.Rais Dkt Samia Suluhu ni kuona Wananchi wanaongeza kipato kwa kujishughulisha na biashara lakini pia usalama wao kulindwa kwa kufanya shughuli zao maeneo ambayo sio hatarishi.

Amesema Serikali imetoa fedha nyingi kutengeneza barabara za mitaa kwenye Wilaya hii kwa lami na zege ambayo uongozi wa wilaya kwa kushirikiana na viongozi wa wafanyabiashara hao wanaweka utaratibu wa kuwahamishia huko.

"Pamoja na uhalali wa kufanya biashara,lakini si uungwana wala si haki kufanya biashara katika eneo la barabara...viongozi wenu wanaendelea kuwasajili Ili kuwahamishia kwenye mitaa tuliyoipanga".Alisema Mhe.Matinyi

Kwa upande wake mwenyekiti wa wafanyabiashara hao Bw.Hashim Joram amemuhakikishia Mkuu wa wilaya kuwa ifikapo kesho zoezi la kuwasajili litakuwa limekamilika na mwisho wa mwezi huu wafanyabiashara wote watakuwa kwenye maeneo yaliyopangwa.

"Usajili unaendelea na leo tumefanya upande huu wa darajani,kesho tunahama upande wa pili na mpaka sasa timeshasajili wafanyabiashara 269,kesho wote hawa tunaenda kwenye mitaa yetu kugawana maeneo".Alisema Mwenyekiti huyo

Eneo hilo la Mbagala limekuwa na mkusanyiko mkubwa wa wafanyabiashara hao ambao wamekuwa wakifanya biashara zao hali ambayo inasababisha uchafuzi wa Mazingira hayo na kuhatarisha usalama wao kwa kupanga bidhaa kwenye barabara hiyo.