WANANCHI 72 WAPATIWA VIWANJA VYAO VILIVYOCHUKULIWA TEMEKE

Posted on: April 14th, 2023

Na:Shalua Mpanda-TMC Habari

Halmashauri ya manispaa ya Temeke imetekeleza kwa vitendo agizo la mheshimiwa Rais Dkt.Samia Suluhu Hassan la kutatua changamoto za wananchi hasa suala la migogoro ya ardhi mara baada ya kukabidhi hati za viwanja 72 kwa wananchi  waliochukuliwa maeneo yao.

Akikabidhi hati hizo leo April 14,2023 Mstahiki meya wa manispaa ya Temeke Abdallah Mtinika amesema wananchi hao walichukuliwa maeneo yao na Halmashauri hiyo miaka mingi iliyopita ili kuyatumia kwa huduma mbalimbali za kijamii ikiwemo ujenzi wa shule na nyinginezo.

Mhe.Mtinika ameongeza kusema kuwa kutokana na ukosefu wa maeneo ya kujengea miundombinu ya huduma za kijamii,inafikia wakati Halmashauri inachukua maeneo ya wananchi lakini wananchi hawana budi kurejeshewa ardhi yao.

 "Leo tumelipa maeneo tuliyochukua na tunawashukuru kwa uvumilivu wenu,viongozi Temeke wanapenda kutenda haki.Kilichotokea hapa leo ni uwezo wa manispaa kutatua migogoro yake ya ndani yenyewe".Alisema Meya huyo.

Awali akisoma taarifa kwa Mstahiki meya,Mkurugenzi wa Manispaa hii ndugu Elihuruma Mabelya amesema katika kutekeleza kwa vitendo dira na dhamira ya manispaa ya Temeke,wameweza kutatua migogoro mitatu kati ya migogoro mikubwa sita.

Mkurugenzi huyo ameitaja migogoro hiyo kuwa ni ule wa Keko Akida na Wananchi,mgogoro mwingine ni wa wananchi uliotokana na uvamizi wa maeneo ya NSSF pamoja na huu wa wananchi 72 ambao wamepatiwa viwanja mbadala katika eneo la Tundwi Songani kata ya Pemba Mnazi manispaa ya Kigamboni.

Hatua hii ya manispaa ya Temeke kuwapatia viwanja hivyo mbadala vyenye thamani ya shilingi 273,564,00 kwa wakazi hao 72 imeondoa kilio cha wakazi hao cha muda mrefu cha kufuatilia maeneo yao huku baadhi yao wakiwa wameshafariki.