WANANCHI WAPONGEZA ZIARA YA MKUU WA WILAYA MHE. MUNKUNDA

Posted on: June 13th, 2023

Na:Shalua Mpanda

Ziara ya mkuu wa wilaya ya Temeke Mhe.Mwanahamisi Munkunda kutembelea kata zote 23 katika Wilaya hii imeanza kuonesha mwanga wa matumaini kwa wananchi huku baadhi ya wananchi wakimuomba Mkuu huyo wa wilaya kutembelea kata hizo mara kwa mara.

Wakiongea kwa nyakati tofauti mara baada ya mkutano wa mkuu wa Wilaya uliofanyika leo Juni 13,2023 katika kata ya Sandali,wananchi hao wamesema kuna changamoto nyingine zinahitaji ufafanuzi tu kutoka kwenye Mamlaka husika hivyo wanaishukuru Serikali ya wilaya kuanzisha utaratibu huu wa kuwafuata wananchi na kusikiliza changamoto zao.

Bi.Husna Arafat mkazi wa kata hiyo amesema mkutano huo na mkuu wa wilaya umemsaidia kufahamu mambo mengi likiwemo la Mfuko wa kunusuru kaya maskini(TASAF).

"Mimi nilikuwa najua kuwa ukiwa mzee au mtu mzima tu unakuwa unaweza kuwa kwenye kupata pesa za TASAF....kumbe kama una nyumba yako tu unakuwa umekosa sifa za kupata pesa hizo".Alisema Bi.Husna.

Awali akimkaribisha Mkuu wa wilaya,diwani wa kata ya Sandali Mhe.Christopher Kabalika amesema mbali na baadhi ya changamoto zilizopo katika kata hiyo,anamshukuru Mhe Rais Samia Suluhu Hassan kwa kuwaletea kiasi cha shilingi milioni 68.7 kwa ajili ya ukarabati wa shule ya msingi Vetenari.

Ziara hiyo ambayo pia ilihudhuriwa na Kaimu Mkurugenzi wa manispaa ya Temeke ndugu Mkana Mkana na baadhi ya wakuu wa Idara ambao nao walishiriki kutoa majibu ya kitaalam.

Ziara hiyo ya Mkuu wa wilaya kutembelea kata zote 23 iliyopewa jina la "Dc Mlangoni kwako" inaendelea kesho Juni 14 katika kata ya Tandika ambapo Chaneli ya mtandaoni-Youtube ya manispaa ya Temeke(TMC TV) itarusha matangazo hayo Mubashara(Live) kuanzia saa 8 kamili alasiri.