WANANCHI WATAKIWA KUJITOKEZA KUPIMA KIFUA KIKUU

Posted on: March 24th, 2023

Na:Shalua Mpanda-TMC habari.

Kuelekea maadhimisho ya Siku ya Kifua Kikuu duniani Machi 24 mwaka huu,manispaa ya Temeke imeandaa zoezi la upimaji na matibabu ya ugonjwa huo bure ambapo wito umetolewa kwa wananchi kujitokeza kupata huduma hiyo.

Akizungumza wakati wa zoezi hilo lililoanza leo Machi 22 hadi Machi 24 mwaka huu,mratibu wa kifua kikuu na ukoma manispaa ya Temeke Dkt.Mary Mkubi amesema ugonjwa huo bado ni tishio katika jamii.

"Kwa mwaka jana tumegundua wagonjwa zaidi ya elfu 4 na baada ya kuona idadi hiyo ikatubidi tuingie mtaani kuwafuata maana wengi wao walikuwa hawajui kama wana maambukizi ya ugonjwa huo kutokana na kutofika kwenye vituo vya afya.

Mmoja wa wananchi aliyepata huduma ya kupima ugonjwa huo katika eneo la Marungu kata ya Tandika mtaa wa Maguruwe bwana Hamisi Muki amesema amepata huduma hiyo bila usumbufu na kuwataka wengine kujitokeza kupima afya zao.

Mratibu wa huduma za maabara katika Manispaa hii Bw.Hamisi Mwamba amesema upimaji huo unafanywa na maabara ya kisasa inayotembea ambapo amesema vifaa hivyo vya kisasa vina uwezo wa kupima na kutambua vimelea sugu vya ugonjwa huo.

Mamia ya watu wamejitokeza leo ikiwa ni siku ya kwanza ya zoezi hilo ambalo linafanyika katika uwanja wa Marungu kata ya Tandika mtaa wa Maguruwe na litaendelea hadi siku ya Ijumaa Machi 24,2023.