Wananchi wilaya ya Temeke Watakiwa Kuhakikisha Wanajiandikisha Kwenye Daftari la Orodha ya Wapiga Kura

Posted on: October 9th, 2019

Mkuu wa wilaya ya Temeke Mhe. Felix Lyaniva amewataka wananchi wote wa wilaya ya Temeke kuhakikisha wanajiandikisha kwenye daftari la orodha ya wapiga kura,zoezi ambalo limeanza rasmi jana tarehe 08/10/2019 na litahitimishwa tarehe 15/10/2019.

Ameyasema hayo leo wakati akitoa taarifa kwa umma kupitia online TV  ya Manispaa (TMC TV)  ofisini kwake wilaya ya Temeke jijini  Dar es Salaam.

Mhe . Lyaniva amefafanua kwamba uandikishaji  huo ni wa siku 7 hivyo ametoa rai kwa wananchi wote wa Temeke kuhakikisha wanatumia siku hizo kikamilifu kwa kuwa hakutakuwa na muda wa nyongeza.

''Maendeleo yoyote katika mtaa au kata yanatokana  na viongozi bora walioko katika ngazi hizo hivyo kupitia  uchaguzi wa serikali za mitaa ndio utakao tupatia viongozi wa kuleta maendeleo hayo hivyo tutumie fursa ya kujiandikisha ili tusipoteze  sifa ya kupiga kura ''

Sambamba na hilo Mhe. Lyaniva amesema kwamba Oktoba  14,  kila mwaka kama  ilivyo kawaida ni kumbukizi ya kifo cha mpendwa wetu hayathayati baba wa taifa Mwl.  Julius K. Nyerere hivyo wilaya ya  Temeke imeandaa Bonaza la kihistoria.

Bonaza hilo litahusisha michezo anuai ikiwemo mpira wa miguu,riadha,michezo ya kuruka kamba na michezo mingine mingi hivyo wananchi ,watumishi wote wa wilaya ya Temeke ,taasisi na mashirika ya umma na binafsi, ndani ya Temeke wanakaribu sana.Muda ni kuanzia saa 12 asubuhi uwanja wa uhuru.