''Watanzania Waje Waone Maajabu Temeke'' DC

Posted on: August 7th, 2019

Mkuu wa wilaya ya Temeke Mheshimiwa Felix  Lyaniva ametoa wito kwa wakazi wa manispaa ya Morogoro na Watanzania kwa ujumla  kufika katika banda la halmashauri ya manispaa ya Temeke ili waweze kujionea mambo mazuri yaliyopo pamoja na kupata elimu katika kilimo,Mali asili, mifugo na uvuvi.Mhe. Lyaniva ametoa wito huo  mapema leo alipotembelea banda la Halmashauri ya manispaa ya Temeke  lililopo ndani ya viwanja vya maonyesho ya Nanenane Morogoro.

Akizungumza mara baada ya kutembea ndani na nje ya banda la Manispaa ya Temeke Mhe. Lyaniva amesema ‘‘Nimefika, nimetembea,nimeona mambo mazuri sana, Nimeona kiwanda cha kutengeneza viatu, unapima kiatu hapohapo,unatengenezewa unaondoka nacho.Kuna mimea ya aina mbalimbali hapa,kuna clinik ya mimea ,kuna bwawa la samaki , kuna mizinga ya nyuki,kuna asali ,kuna masega ya asali, kuna mtego  kwa ajili ya kuangamiza kunguru weusi,kuna wanyama wa aina mbalimbali,hata mbwa yupo hapa, kuna bidhaa mbalimbali za kusindikwa, kuna mapambo ya kina mama,viatu,mikoba,nguo.Hapa ni mahali pazuri sana pa kujifunza.Njoo ufundishwe jinsi ya kulima kilimo kitakachokunufaisha,njoo ufundishwe jinsi mbwa anavyoweza kukusaidia kulinda mazao yako shambani ,njoo ufundishwe namna unavyoweza kufuga samaki na kujipatia kipato, njoo ujifundishwe namna bora ya kufuga nyuki, na jinsi ya kurina asali,njoo ujifunze kwa wajasiliamali wetu, na wewe uweze kutoka kimaisha.Nachukua fursa hii kuwakaribisha wakazi wa manispaa ya  Morogoro na Watanzania wote  waje waone maajabu  Temeke’’.

Mhe. Lyaniva pia amesema kwamba Temeke imejipanga vema,kwani hata bidhaa za wajasiliamali wake ni za kiwango cha juu  , hali inayodhihirisha kwamba wana Temeke wamedhamiria kuunga mkono kwa vitendo kauli mbiu ya Mhe. Rais ya kuwa na Tanzania ya viwanda.

Aidha  amewataka Watanzania ambao ni walengwa wa TASAF kufika katika banda la manispaa ya Temeke ili waone jinsi ambavyo walengwa wa TASAF Temeke wanavyotumia fedha za ruzuku  kufanya shughuli mbalimbali za kiuchumi.Wamejiunga kwenye vikundi, wamejifunza kutengeneza vitu mbalimbali,wanajipatia kipato.Katika hatua nyingine  Mhe. Lyaniva  amewapongeza wataalamu wa halmashauri ya manispaa ya Temeke waliohusika katika maandalizi ya nanenane kwa mwaka 2019 kwa namna ambavyo wamefanya maandalizi mazuri, na kila mwaka wamekuwa wakiboresha ili kuhakikisha kwamba mambo yanakwenda vizuri..

Halmashauri ya Manispaa ya Temeke kama zilivyo halmashauri nyingine inashiriki katika maonesho ya wakulima na wafugaji – nanenane kanda ya mashariki ,ambapo vitu vyote vinavyoonyeshwa katika banda lake  viko katika ubora wa kiwango cha juu.

..........MWISHO...........