WATENDAJI TEMEKE WAPONGEZWA KWA KUANZISHA SHULE MPYA

Posted on: November 16th, 2022

Na; Nassoro Rashid - TMC Habari

Leo Novemba 16, 2022 Naibu Katibu Mkuu, Ofisi ya Rais Tawala za Mikoa na Serikali za Mitaa (TAMISEMI) ndugu Kailima Ramadhani amefanya ziara katika Manispaa ya Temeke.

 Katika ziara hiyo naibu katibu mkuu Kailima ametembelea   shule ya msingi Mji Mpya,Shule ya msingi Mbande pamoja na Shule ya sekondari Mbande, ambapo alizungumza na walimu wakuu wa Shule hizo kufahamu changamoto zilizopo sambamba na kukagua  maendeleo ya ujenzi wa vyumba 12 vya madarasa katika shule ya sekondari Mbande.

Akizungumza katika mahojiano mafupi na TMC Habari ,naibu katibu mkuu Kailima alisema, 

" Hapa nimefika nipo shule ya sekondari Mbande, na kweli wana ujenzi wa madarasa 12 na wapo katika hatua mbali mbali, ila wameniahidi mpaka Disemba 15, 2022 watakuwa wamekamilisha kila kitu". 

Katika hatua nyingine naibu katibu mkuu Kailima  amewapongeza watendaji wa Manispaa ya Temeke kwa kuanzisha shule mpya ya Msingi ikiwa ni miongoni mwa jitihada za kupunguza msongamano wa Wanafunzi katika baadhi ya Shule.

"Nimpongeze mkurugenzi wa Manispaa ya Temeke kwa kutoa zaidi ya shilingi Milioni 300 kwa ajili ya uanzishwaji wa shule nyingine mpya ambayo itakuwa inasaidia kupunguza wanafunzi kwenye shule ya msingi Mbande , kwa hiyo nitoe pongezi kwa watendaji wote wa manispaa hii". Alisisitiza naibu katibu mkuu  Kailima.

Ziara hii ni muendelezo wa ziara zake alizozifanya katika mikoa ya Iringa, Njombe, Ruvuma, na leo amefika Dar es salaam ambako ametembelea Manispaa ya Kigamboni na Temeke .