WATOTO 120 WANUFAIKA NA BIMA YA AFYA BURE KATA YA KURASINI

Posted on: November 30th, 2022

Na:Shalua Mpanda-TMC

Katibu Tawala wa wilaya ya Temeke Bi.Bupe Mwakibete amekabidhi kadi 120 za Bima ya Afya(NHIF) kwa watoto wanaoishi kwenye mazingira magumu katika kata ya Kurasini.

Akizungumza katika hafla fupi iliyofanyika ofisi za Kata hiyo Novemba 30,2022 Katibu Tawala Mwakibete amesema kadi hizo ni ahadi ya mkuu wa wilaya ya Temeke mheshimiwa Jokate Mwegelo aliyoitoa kwa diwani wa Kurasini Mhe.Arnold Peter.

"Mkuu wa wilaya aliona changamoto kwa baadhi ya watoto kukosa huduma za afya kutokana na hali waliyonayo,akatafuta wadau ambao wameweza kutoa Bima hizi zitakazowasaidia watoto hawa katika huduma za afya".Alisema Bi.Bupe

Kwa upande wake diwani wa kata ya Kurasini ambaye pia ni naibu meya wa manispaa ya Temeke Mhe.Arnold Peter amesema anamshukuru sana mkuu wa Wilaya kwa kuwezesha kupatikana kwa Bima hiyo ambayo itakuwa msaada mkubwa kwa familia hizo.

"Niwakumbushe wazazi kuwa bima hii itadumu kwa kipindi cha mwaka mmoja tu, na gharama yake ni shilingi elfu 50 na mia 4,Serikali imelipa gharama ya mwaka mmoja na mnaweza kuwekeza shilingi mia 1 kila siku kwa mwaka utaweza kulipia hii ili Serikali iweze kuwahudumia watoto wengine mwakani".Alisisitiza Diwani huyo.

Baadhi ya Wananchi waliohojiwa na mwandishi wetu waliishukuru Serikali ya awamu ya sita inayoongozwa na Mhe.Rais Samia Suluhu Hassan pamoja na mkuu wa wilaya Temeke Jokate Mwegelo kwa kuendelea kuwezesha jambo hilo ambalo litawapunguzia gharama za matibabu.

Bima ya Afya imekuwa mkombozi mkubwa kwa Wananchi hasa ikizingatiwa kuwa huduma za matibabu ni gharama.