WATOTO WAKUMBUSHWA KUZINGATIA MAADILI NA KUJENGA MAARIFA

Posted on: June 16th, 2024

Na: Sweetbetter Njige

TMC Habari.

Leo Juni 16,2024 manispaa ya Temeke imeungana na Nchi nyingine barani Afrika kuadhimisha siku ya mtoto Afrika katika hafla iliyofanyika katika ukumbi wa Idd Nyundo.

Akizungumza na wawakilishi wa watoto wa wilaya ya Temeke mstahiki meya Abdallah Mtinika amewataka watoto kujenga maarifa ili yawasaidie ukubwani na kuwakumbusha wazazi kuwalinda watoto dhidi ya mazingira hatarishi.

"Kama kauli mbiu inavyosema ukiwa na maarifa na maadili unakuwa mtoto mzuri, kuchezea simu ya mama au baba yako na kuangalia vitu visivyofaa sio maadili na hujijengei maarifa na hiyo ni tabia mbaya, ukiharibika na malengo yako yatapotea.

Wazazi na walezi, tujitahidi kuwalinda watoto wasiende kwenye maeneo hatarishi, badala yake tuwahimize washiriki katika klabu za watoto shuleni"

Aidha mkuu wa idara ya maendeleo ya jamii Furaha Chiwile amesema manispaa ya Temeke kupitia viongozi wake na wataalam wa ustawi wa jamii itaendelea kuwaangalia watoto kwa ukaribu na kuwalinda.

"Watoto ni taifa la leo na la kesho, tunawategemea kuwa viongozi mahiri, wazazi, walezi, wataalam. Tutaendelea kuwaangalia na kuwatunza"

Maadhimisho ya siku ya mtoto Afrika mwaka 2024 yanabebwa na kauli mbiu Kauli "ELIMU JUMUISHI KWA WATOTO: IZINGATIE MAARIFA, MAADILI NA STADI ZA KAZI".