WATOTO WAPEWA MBINU KUJILINDA DHIDI YA UKATILI WA KIJINSIA

Posted on: November 2nd, 2023

Na: Sweetbetter Njige

TMC Habari.

Kuelekea maadhimisho ya siku ya Kimataifa ya kupinga  ukatili wa kijinsia, leo Novemba 2,2023 manispaa ya Temeke  kupitia idara ya Maendeleo ya jamii imetoa elimu kwa Wanafunzi wa shule za msingi Sandali, Mtoni na Matern Lumbanga ili kukuza uelewa kuhusiana na suala zima la unyanyasaji wa kijinsia, namna ya kujilinda na kuripoti vitendo vya kikatili.

Akizungumza katika zoezi hilo afisa maendeleo ya jamii mwandamizi Bi. Herieth Kamara amesema elimu hiyo inatolewa kwa wanafunzi kwakua bado ni watoto, hivyo wapo kwenye hatari zaidi ya kukutana na vitendo vya unyanyasaji. Alisema

"Tunatoa elimu kwa Wanafunzi kwenye shule za msingi katika kata mbalimbali, mafunzo haya yanatolewa kwa kundi hili kwakua lipo kwenye hatari zaidi, wanakumbana na ukatili majumbani, shuleni na kwakua wengi hawajui namna ya kutoa taarifa juu ya ukatili, tunaimani kuongea nao kunaweza kuwasaidia kwa namna moja au nyingine"

Kwa upande wake muwezeshaji wa semina hiyo kutoka dawati la jinsia kituo cha Polisi Chang'ombe ACP Blandina Ndunguru amesema ni muhimu kwa watoto kufahamu maana ya unyanyasaji aina zake na namna ya kujilinda.

"Mara nyingi watoto hunyanyaswa na watu wa karibu hususani wazazi, ndugu na majirani, tunafanya hivi wafahamu namna ya kujilinda wenyewe, lakini wazazi pia wanatakiwa kuacha kutanguliza maslahi mbele badala ya kujali utu wa watoto".

Mafunzo hayo yanayofadhiliwa na UN Women yataendelea kufanyika katika shule  mbalimbali za msingi  wilayani Temeke, ikiwa ni sehemu ya maadhimisho ya siku ya Kimataifa ya kupinga ukatili wa kijinsia ambayo  kilele chake  kitakua Novemba 25, 2023.