WATUMISHI WA UMMA WATAKIWA KUZINGATIA MATUMIZI SAHIHI YA TEHAMA

Posted on: August 12th, 2021

Taasisi ya kuzuia na kupambana na rushwa(TAKUKURU) na Mamlaka ya Mawasiliano Tanzania (TCRA) wametoa elimu juu ya matumizi sahihi ya TEHAMA kwa watumishi wa manispaa ya Temeke. Tukio hilo la utoaji elimu limefanyika leo Agosti 10,2021 katika ukumbi wa Manispaa (Iddi Nyundo) na kuhudhuriwa na mkurugenzi wa manispaa hiyo ndugu Elihuruma Mabelya,wakuu wa Idara na watendaji wa Kata zinazounda manispaa ya Temeke.

Katika mafunzo hayo, wataalamu hao wa TCRA na TAKUKURU wamelenga kukuza uelewa juu ya namna sahihi ya matumizi ya TEHAMA, kufafanua sheria na kanuni za mitandao kwa watumishi.

Akitoa ufafanuzi kuhusu mambo wanayopaswa kufanya watumishi ili kuepuka matumizi yasiyo sahihi ya TEHAMA,Afisa TEHAMA wa TCRA ndugu Hatibu Chande amesema ni muhimu kwa kila mtumishi wa Umma kuzingatia matumizi sahihi ya TEHAMA ikiwemo kutokutumia akaunti za ofisi kufanya mambo binafsi,kuhakiki taarifa ili kutokutoa taarifa za uongo pamoja na kuzingatia kujilinda.

"Tunajua moja kati ya changamoto kubwa katika mitandao ni 'fake news', wizi wa mtandaoni na virusi vya kompyuta.....Tunaweza kujilinda kwa kuhakikisha taarifa,na kuweka 'anti-virus' kwenye kompyuta zetu na tusitumie akaunti za ofisi kufungua akaunti binafsi".Alisisitiza Ndg. Chande.

Naye mwanasheria kutoka TCRA Violet Esseko (SLO) amefafanua sheria na kanuni mbalimbali za mitandao na kuwasisitiza watumishi kufikisha elimu wa wananchi ili watambue na kujiepusha na makosa ya kimtandao.

Wakati huo huoTaasisi ya Kuzuia na Kupambana na Rushwa (TAKUKURU) kupitia mtoa elimu mwakilishi Ndg. Esther Mkokota imesisitiza TEHAMA kutumika ipasavyo katika kubainisha vitendo vya rushwa kwa kutumia 'Application' ya PCCB na namna nyingine za KITEHAMA ili kuondoa vitendo vya rushwa nchini Tanzania.

Kwa upande wake mkurugenzi manispaa ya Temeke Ndg. Mabelya amewashukuru waelimishaji hao na kuahidi kufanyia kazi elimu na ushauri uliotolewa juu ya kutumia TEHAMA kwa ufasaha.