Wazee Temeke Wampongeza Rais Magufuli

Posted on: October 1st, 2019

Wazee wa wilaya ya Temeke wamempongeza Rais wa Jamhuri ya Muungano wa Tanzania Mhe. John Pombe Joseph Magufuli kwa jitihada mbalimbali anazozifanya katika kuleta maendeleo.

Pongezi hizo zimetolewa Oktoba Mosi wakati wa maadhimisho ya siku ya wazee ,ambayo kiwilaya yamefanyika katika ukumbi wa manispaa, maarufu kama Idd Nyundo.

Wakizungumza kwa nyakati tofauti wazee hao wamesema kwamba katika awamu ya Rais Magufuli wameona maendeleo makubwa ,ambayo hawakutegemea kuyaona ,lakini kutokana na jitihada na uchapakazi wa Mhe. Rais sasa wanashuhudia barabara za lami mitaani,ununuzi wa ndege,ujenzi wa madaraja,ujenzi wa reli ya kisasa,ujenzi wa hospitali,vituo vya afya na zahanati,miradi ya umeme,elimu bure na mengine mengi.

Aidha wamemshukuru Mhe. Rais kwa namna ambavyo amekuwa akiwajali na kuwathamini ,hata kufikia hatua ya kuona umuhimu wa wazee kupatiwa kadi maalum ambazo zinawawezesha kupata huduma za afya bila kuchangia fedha,jambo ambalo limesaidia kupunguza changamoto za kiafya ambazo zinawakabili kutokana na umri wao.

Katika hatua nyingine wazee wamebainisha changamoto zinazowakabili ,ambapo changamoto kubwa ni ukosefu wa baadhi ya dawa wanazoandikiwa pamoja na ucheleweshaji wa malipo yao ya kustaafu (kiinua mgongo).

Naye Kaimu Mkurugenzi wa manispaa ambaye pia ni Mkuu wa idara ya  Mipango,Takwimu na Ufuatiliaji  wa manispaa   ya Temeke ndugu  Deogratius  Lukomanya  ameahidi kushughulikia changamoto zote zilizo ndani ya uwezo wa manispaa,na zile  ambazo zinahusisha mambo ya kisera zitapelekwa serikali kuu ili ziweze kutatuliwa .

Siku ya wazee huadhimishwa kila Oktoba mosi, ambapo kwa mwaka 2019,Siku hiyo kitaifa, imeadhimishwa mkoani Mtwara.