WAZEE TEMEKE WAPEWA DARASA

Posted on: June 15th, 2024

Na: Sweetbetter Njige

TMC Habari.

Leo Juni 15,2024 manispaa ya Temeke imeadhimisha siku ya kupinga ukatili kwa wazee kwa kufanya kikao katika kituo cha afya Buza na baraza la wazee wilaya ya Temeke linaloongozwa na mwenyekiti wake Mohammed Mbonde.

Kikao hicho kilichojumuisha mafunzo mbalimbali kuhusu afya, lishe na mtindo bora wa maisha kimelenga kuwaleta pamoja wazee, kujadili changamoto zinazowakabili hasa kwa upande wa huduma za afya.

Akizungumza na wazee hao mganga mkuu wa wilaya ya Temeke,Dkt. Jonas Lulandala amesema

"Tunatambua uzee ni suala la muda, wote tutaelekea huko Mwenyezi Mungu akitujalia uhai na umri, na kwa kutambua hilo tutaendelea kuwahudumia na kuwasaidia kutatua changamoto zinazowakabili, tuendelee kushirikiana, endeleeni kutupa mrejesho nini tufanyie kazi, tutatekeleza, tupo kwa ajili ya kuwahudumia"

Akitoa shukrani  kwa niaba ya wazee wa Temeke mwenyekiti Mbonde amesema

"Tumepata mafunzo ya huduma za macho, lishe na mambo mengine mapya, katika umri tulio nao tunapaswa kujitunza. 

Kwa upande wa huduma za wazee Temeke tunajitahidi kuna madirisha 30, siku maalum za kuona wazee, kadi za msamaha na mengine kikubwa tunaomba waongeze bima za wazee ili iwe bora zaidi"

Siku ya kupinga ukatili dhidi ya wazee inayoadhimishwa Juni 15 kila mwaka imechaguliwa na Umoja wa Mataifa kuenzi taswira, uzoefu na busara ya wazee wote katika jamii zetu kwa kupinga vitendo viovu na ukatili unaofanywa dhidi ya wazee.