WAZIRI BASHUNGWA AMUAGIZA MKANDARASI KUMALIZA KAZI KWA WAKATI

Posted on: July 8th, 2022

Waziri wa nchi ofisi ya Rais – TAMISEMI  mheshimiwa Innocent Bashungwa amemuelekeza mkandarasi mshauri ‘Group Six International Limited’ kuhakikisha kuwa kufikia Septemba 30,2022 mradi wa ujenzi wa barabara ya Nzasa Kilungule - Buza uwe umekamilika .

Waziri Bashungwa ametoa maelekezo hayo leo  Julai 08,2022 wakati  wa ziara yake ya utekelezaji wa ilani ,aliyoifanya katika halmashauri ya manispaa ya Temeke ambapo amekagua barabara ya Nzasa Kilungule Buza ,ujenzi wa daraja  pamoja na kituo cha mabasi Buza.

Mara baada ya kukagua barabara hiyo mheshimiwa Bashungwa alikuwa na haya ya kusema “Waheshimiwa wabunge wa Temeke wamekuwa wakifuatilia kwa nguvu kubwa sana  juu ya utekelezaji wa barabara hii ambayo tunaitembelea,barabara ya Nzasa Kilungule Buza.

Nimshukuru sana Rais wetu mama Samia Suluhu Hassan  na serikali anayoiongoza ya awamu ya Sita alitoa bilioni 21.5 kwa ajili ya kutatua kero  ya  wananchi wa Temeke.Na mimi nimefika kwa niaba ya Mhe. Rais  kuona bilioni 21.5 ambayo alituwezesha kupitia ofisi ya Rais – TAMISEMI ,TARURA kwenye miradi ya DMDP , utekelezaji wa hii barabara unavyokwenda.

Nikupongeze sana pia Mhe. mkuu wa Wilaya kwa namna ambavyo umesimamia  jambo hili, lakini  kwa ujumla unavyosimamia  utekelezaji wa ilani ya Chama Cha Mapinduzi ndani ya  wilaya ya Temeke,lakini vile vile Mkurugenzi  kwa namna ambavyo unamsaidia mkuu wa Wilaya katika kusimamia  yale ambayo yanahusu Halmashauri”

Naye mkuu wa wilaya ya Temeke Mhe. Jokate Mwegelo amemhakikishia Mhe. Bashungwa kuwa shughuli za serikali wilayani humu zinasimamiwa vizuri.”Mhe. sisi kazi yetu kubwa ni kuhakikisha tunasimamia utekelezaji wa ilani ya Chama Cha Mapinduzi,kusimamia fedha ambazo Mhe. Rais Samia Suluhu Hassan analeta kwa ajili ya kuwakomboa Wananchi.”Alisisitiza Mhe. Jokate.

Akizungumza kwa niaba ya Wananchi, diwani wa kata hiyo Mhe. Said Fella amesema “Sisi kama Wanakilungule kwanza tunamshukuru mama Samia kwa kutuwezesha, hii barabara kupitika,maana kulikuwa na changamoto sana,watu walikuwa wanatumia barabara moja tu ya Mbagala.