WILAYA YA TEMEKE KUZINDUA SIKU YA USAFI DISEMBA 04

Posted on: December 2nd, 2021

WILAYA YA TEMEKE KUZINDUA SIKU YA USAFI DISEMBA 04.

Mkuu wa wilaya ya Temeke Mheshimiwa Jokate Mwegelo ameunga mkono agizo la mkuu wa mkoa wa Dar es salam kwa kutangaza tarehe rasmi ya uzinduzi wa kampeni ya usafi wilayani hapa.

Akizungumza na Wananchi katika eneo la TAZARA ( Daraja la juu la Mfugale), Alhamisi Disemba 2,2021 Mkuu huyo wa Wilaya amesema kampeni ya usafi Kimkoa itazinduliwa rasmi siku ya Jumamosi Disemba 4,2021 ambapo kila wilaya itashiriki kufanya usafi katika maeneo yao.

"Temeke itazindua rasmi kampeni ya usafi Disemba 4,2021, kampeni hii itafanyika katika ngazi ya wilaya,kata hadi mitaa yote, hivyo basi watendaji wote wa Wilaya,Kata na Mitaa tutoe elimu juu ya suala la usafi kwa Wananchi".Alisema Mhe.Jokate

Katika hatua nyingine Mhe.Jokate ameeleza kusudio lake la kutaka kuyaendeleza,kuyapendezesha, na kuyatunza maeneo mbalimbali ya Temeke ili yaweze kutumika kwa mapumziko.

"Tunataka kupendezesha Temeke yetu, mfano eneo la Mwembeyanga iwe sehemu nzuri yenye kupendeza na kuvutia watu watakayokuwa wakienda kutulia.Suala la usafi si la viongozi tu, Wananchi wote tushirikiane kufanya usafi wa mazingira yetu ili yaweze kuvutia na kupendeza".Alisisitiza Mkuu huyo wa wilaya.

Kampeni hiyo maalum iliyoanzishwa na Mkuu wa Mkoa wa Dar es salaam Mhe.Amos Makalla yenye kauli mbiu "Safisha,Pendezesha Dar es salaam" inatarajiwa kufanyika katika wilaya zote tano za mkoa wa Dar es salaam.