WIZARA YA ARDHI YAENDESHA MAFUNZO KWA WAJUMBE KAMATI ZA URASIMISHAJI

Posted on: May 20th, 2024

Wizara ya Ardhi, Nyumba na Maendeleo ya Makazi kupitia Mradi wa uboreshaji usalama wa Milki za Ardhi Nchini (LTIP) leo Mei 20, 2024 imeendesha mafunzo kwa wajumbe wa kamati za urasimishaji katika mitaa wilayani Temeke ili kujenga uelewa juu ya majukumu na masuala muhimu yanayopaswa kuzingatiwa na kamati hizo katika kufanikisha zoezi la ukwamuaji na urasimishaji ambalo ni muarobaini katika kumaliza migogoro ya ardhi na kuongeza usalama wa Milki za ardhi Nchini.

Kikao hicho kimeshirikisha kamati kutoka mitaa ya sigara, machimbo, mizambarauni, dovya, uwazi, na mikwambe ambapo wajumbe wamepata elimu juu ya namna bora ya kushiriki katika zoezi hilo ikiwemo kueleza na kutatua changamoto zilizojitokeza kwenye upimaji makazi uliofanyika kwenye maeneo yao hapo awali.

Kamati hizo zimesisitizwa kushiriki katika upangaji, kufuata taratibu, kuratibu shughuli za urasimishaji ikiwemo kuhamasisha wananchi kulipia gharama za upimaji kwa kushirikiana na makampuni ya upimaji yaliyosajiliwa kwa mujibu wa sheria.

Ikumbukwe kuwa urasimishaji ni upangaji wa pamoja wa wakazi waliojenga na kuishi katika eneo husika. Unaowezesha wananchi kukubaliana mipaka ya viwanja, kufungua njia na kutoa maeneo ya huduma za jamii na maeneo ya wazi.