ZAIDI YA SHILINGI MILIONI 100 ZATUMIKA KUTEKELEZA AFUA ZA LISHE TEMEKE

Posted on: May 23rd, 2024

Na:Francisca Mselemu

Kamati ya lishe Manispaa ya Temeke imekaa kikao chake cha robo ya tatu Mei 23,2024 ambapo kikao hicho kimehusisha uwasilishaji wa taarifa za utekelezaji wa afua za lishe kutoka divisheni za Elimu Msingi,Elimu Sekondari,Maendeleo ya Jamii pamoja na Kilimo,Mifugo na Umwagiliaji.

Akizungumza wakati akiwasilisha taarifa ya utekelezaji wa viashiria vya mkataba wa lishe, Mratibu wa lishe manispaa ya Temeke Bi. Happy Mkunda amesema kuwa kwa kipindi cha Januari hadi Machi 2024 Manispaa imetumia asilimia 119.99 sawa na shilingi 106,773,076.00 ya fedha zilizopangwa kutekeleza afua za lishe kutoka kwenye vyanzo mbalimbali vya mapato.

Akitoa ufafanuzi kuhusu matumizi ya fedha hizo Bi Mkunda amesema:

‘‘Manispaa imetoa fedha kwa wakati,utolewaji wa fedha hizo umewezesha utekelezaji wa shughuli mbalimbali za lishe zikiwemo kutenga zaidi ya shilingi 1000 kwa kila mtoto,ambapo tuliweza kutenga kiasi cha shilingi 2,526.8.Kufanya usimamizi shirikishi katika vituo vya kutolea huduma na ngazi ya jamii,Kuwawezesha watoa huduma ngazi ya jamii kufanya tathimini ya hali ya lishe ,sambamba na kuwezesha utoaji wa mafunzo kwa watoa huduma ngazi ya jamii juu ya namna ya kutengeneza maziwa tiba kwa ajili ya matibabu ya utapiamlo’’.

Pamoja na mambo mengine,Bi Mkunda ameeleza mafanikio katika utoaji wa vidonge vya madini ya chuma na asidi ya Folik(FeFo) ambapo amesema kuwa vidonge vimetolewa katika vituo vyote vinavyotoa huduma za uzazi.

Naye mdau wa masuala ya lishe kutoka katika mradi wa USAID "Afya yangu – Mama na Mtoto"unaotekelezwa na shirika lisilo la kiserikali la Jh piego, Daktari Method Bulongeleje amesema kuwa suala la lishe ni suala muhimu katika kupunguza vifo vya watoto wa umri chini ya miaka 5.

Halmashauri ya Manispaa ya Temeke inasimamia utekelezaji wa mkataba wa lishe katika kata zote 23,kuimarisha hali ya lishe na kupunguza aina zote za utapiamlo ikiwemo udumavu,ukondefu,uzito pungufu na upungufu wa vitamin na madini ambapo imeweza kupunguza changamoto za kiafaya vikiwemo vifo.