ZAIDI YA WANANCHI 1,800 WAPATA MATIBABU BURE KUTOKA JWTZ MBAGALA RANGITATU

Posted on: August 31st, 2022

Imeelezwa kuwa zaidi ya wananchi elfu moja mia nane wamepatiwa huduma za matibabu na uchunguzi wa Afya katika maadhimisho ya wiki ya majeshi ya Afrika mashariki kuanzia Agosti 29 mpaka Agosti 31,2022.

Hayo yameelezwa na mratibu wa zoezi hilo Kanali Kishosha kutoka Jeshi la Wananchi wa Tanzania(JWTZ) kwa mkuu wa wilaya ya Temeke mheshimiwa Jokate Mwegelo wakati akitoa taarifa ya zoezi hilo leo Agosti 31,2022 katika hospitali ya Mbagala Rangitatu.

"Siku ya kwanza tulihudumia Wananchi mia tatu thelathini na zaidi,jana tumehudumia watu mia saba na zaidi na leo hii mpaka sasa tumeshahudumia Wananchi mia nane na muda unavyozidi kwenda naamini idadi itaongezeka".Alisema Mratibu huyo

Naye Meja Jenerali Iddy Nkambi ambaye alimuwakilisha Mkuu wa majeshi ya ulinzi na usalama Nchini,amesema kuwa maadhimisho ya wiki ya majeshi ya Afrika Mashariki pamoja na shughuli nyingine za kijeshi,JWTZ limeshiriki kutoa huduma za kijamii zikiwemo matibabu bila malipo na kusaidia makundi yenye mahitaji maalum.

"Pamoja na majukumu yako mengi Mkuu wa wilaya umeamua kuja kushiriki na sisi kwenye tukio hili ambalo linawagusa wananchi ambao wanapatiwa huduma hii, na hili ni jukumu letu sote kuhakikisha jamii inakuwa salama".Alisema Meja Jenerali Nkambi

Wiki ya majeshi ya Afrika mashariki inafikia tamati kesho Septemba mosi ambapo kwa wiki nzima Jeshi la Wananchi wa Tanzania(JWTZ) wakishirikiana na majeshi washirika wa nchi za Afrika mashariki wameshiriki kufanya shughuli mbalimbali za kijamii ikiwemo kutoa huduma za matibabu bure kwenye baadhi ya vituo vya kutolea huduma za afya hapa nchini.