MD SATURA ATETA NA WATUMISHI WA MAKAO MAKUU TEMEKE

Posted on: June 3rd, 2025

Mkurugenzi wa Manispaa ya Temeke Ndg. Jomaary Satura leo Juni 3,2025 amezungumza na Watumishi wa Idara na Vitengo mbalimbali vya halmashauri na kusisitiza juu ya mambo makuu matatu.

Akizungumza katika kikao hicho mkurugenzi Satura amewashukuru Watumishi kwa kazi nzuri wanayoendelea kufanya, amewasihi kufanya kazi kwa juhudi na kushirikiana na wafanyakazi wa kanda (cluster) kufanya kazi za ukusanyaji mapato. Alisema

“Nimeona tuzungumze ili tuendelee kusafiri pamoja na kila mmoja wetu ajue kituo kinachofuata, lakini kwanza kuwapongeza na kuwashukuru kwa kazi kubwa mnayofanya, tumekuwa na mazoezi mengi sana (uchaguzi wa Serikali za mitaa, uboreshaji wa daftari la kudumu ka wapiga kura, mbio za Mwenge wa Uhuru) na oparesheni zetu za kila siku mnafanya kazi kubwa sana.

Pili niwasihi muendelee kufanya kazi nzuri na kuendelea kuwatumikia waajiri wetu ambao ni Wananchi wa eneo hili kwa weledi na utashi, kama kuna mahali tulikua tunaishia kwenye kuwahudumia Wananchi basi tuongeze juhudi kwakuwa baada ya yote tunarudi kwao kukusanya kodi kwa ajili ya maendeleo ya manispaa yetu

Tatu niwapongeze kwenye suala zima la ukusanyaji mapato, twende tukakusanye mapato kwa staha na heshima na si kwa mateke na kudhalilishana, tunapokwenda kufanya kazi hizi tulinde taswira ya taasisi yetu.”

Aidha MD Satura amewakumbusha Watumishi kuzingatia misingi ya kufanya kazi iliwemo kukumbuka majukumu makuu mawili ambayo ni jukumu la kiutawala na kuboresha ustawi wa maisha ya Wananchi.