MEYA TINIKA APOKEA MADAWATI KUTOKA KWA WADAU WA MAENDELEO

Posted on: August 30th, 2024

Na:Shalua Mpanda

Mstahiki meya wa manispaa ya Temeke Abdallah Mtinika leo Agosti 30,2024 amepokea msaada wa madawati 50 kutoka kampuni ya Euro Wood Crafts utakaosaidia kupunguza uhaba wa madawati katika shule za Manispaa hii.

Akizungumza wakati wa kupokea msaada huo,mheshimiwa Mtinika amemshukuru Mkurugenzi wa kampuni hiyo ndugu Zaki Ul Azam kwa kuunga mkono juhudi za Serikali katika kuboresha mazingira ya elimu.

"Msaada huu umekuja wakati muafaka na nitoe wito kwa wanafunzi kuyatunza madawati haya ili yadumu na kuwashawishi ndugu zetu hawa waendelee kutuletea msaada zaidi".Alisema Mtinika

Kwa upande wake muwakilishi wa Kampuni hiyo Bi. Nancy Mallya amesema kampuni hiyo yenye makazi yake kata ya Mtoni imekuwa ikitoa misaada yenye lengo la kuunga mkono juhudi za Serikali kwa muda mrefu ambapo mwaka 2023 ilitoa pia idadi kama hiyo ya madawati.

Mkuu wa Idara ya Elimu Msingi wilayani Temeke ndugu Abdul Buheti ametoa wito kwa wadau wengine kujitokeza kusaidia sekta ya elimu hasa katika kipindi hiki ambacho kuna idadi kubwa ya uandikishwaji wa watoto kutokana na Serikali kutoa elimu bure.

Madawati hayo yamegawanywa katika shule mbili zenye idadi kubwa ya wanafunzi wilayani Temeke ambazo ni shule ya msingi Mchikichini iliyopata madawati 20 na Kilamba iliyopata madawati 30.