"AFYA NA MAZINGIRA VINAENDA SAMBAMBA" DC JOKATE

Posted on: June 5th, 2022

Mkuu wa wilaya ya Temeke Mheshimiwa Jokate Mwegeleo kwa niaba ya mkuu wa Mkoa wa Dar es Salaam Mhe. Amos Makalla leo Juni 05,2022 ameongoza maadhimisho ya siku ya mazingira Duniani na ufunguzi wa kampeni ya afya "AFYA CHECK DAR ES SALAAM", yaliyofanyika kimkoa katika viwanja vya Zakheim-Mbagala.

Katika madhimisho hayo Mhe. Jokate ameungana na viongozi wa kisiasa na Serikali kutoka wilaya zote za mkoa wa Dar es Salaam, Wadau wa Mazingira, Wadau wa Afya , Wanafunzi na Wananchi na kutoa wito kwa Watanzania wote hususani wakazi wa Temeke na Dar es Salaam kwa ujumla kuenzi siku na kauli mbiu ya mazingira kwa vitendo. Alisema

"Tanzania ni moja tu , tafsiri nyepesi ni kwamba hatuna Tanzania nyingine, kila mmoja wetu ana wajibu wa kutunza mazingira ili yaitunze nchi yetu, isiwe tu sherehe iwe tukio muhimu linalotukumbusha umuhimu wa kuhifadhi na kutunza mazingira.

Wadau tukatoe elimu ya matumizi ya nishati mbadala, upandaji miti na tuiishi kampeni iliyoanzishwa na Mkuu wa Mkoa (Safisha, Pendezesha Dar es Salaam) tusitupe taka kwenye mitaro, tunafahamu kazi ya mitaro , lakini kwa bahati mbaya imegeuzwa kuwa 'dampo' ikijaa takataka sio tu maeneo yatakua machafu, mvua ikinyesha maji yanaenda kujaa majumbani kwetu"

Akizungumzia kampeni ya 'Afya Check " mkuu wa Wilaya alisema suala la mazingira linaenda sambamba na suala la afya hivyo tuyatunze mazingira kwa afya zetu.

"Huwezi kuzungumzia afya bila kuzungumzia mazingira vivyo hivyo mazingira bila kuzungumzia afya, kithibitisho ni wakati wa mlipuko wa UVIKO 19 ,tuliongeza umakini, tulikua tunanawa sana mikono, tunajali afya zetu na za wenzetu,ile imesaidia sana kupunguza magonjwa ya mlipuko kama kipindupindu, leo watu watapima bure magonjwa mbalimbali.

Niwashukuru sana 'Clouds Media group' kupitia mwakilishi Daktari Isaac Maro, kwa kutuletea jambo hili la msingi Temeke na Dar es Salaam kwa ujumla" Alisisitiza Mhe. Jokate.