BILIONI 15 KUTENGENEZA BARABARA KATA YA TOANGOMA

Posted on: August 24th, 2024

Na: Joanita Joseph -TMC Habari

Takribani Bilioni 15 zinatarajiwa kutumika katika matengenezo ya Barabara katika kata ya Tuangoma, Manispaa ya Temeke katika Mwaka huu wa fedha 2024/2025.

Hayo yamebainishwa na Mhandisi Masatu Ndango kutoka Wakala ya Barabara za Vijijini na Mijini (TARURA) Wilaya ya Temeke akieleza Mpango wa Serikali wa matengenezo ya Barabara katika kata ya Tuangoma, Wilayani Temeke.

Mhandisi Masatu ameyasema hayo katika Mkutano wa Hadhara wa Mkuu wa Wilaya ya Temeke Mhe. Sixtus Mapunda wakati alipokuwa akijibia kero za Wananchi katika Miundombinu korofi ya Barabara katika kata ya Tuangoma.

Mhandisi Masatu amesema kuwa

"Bilioni 15 zinatarajiwa kutengeneza barabara hapa Tuangoma ambapo kati ya hizo Bilioni 14 zinatoka katika mpango wa mradi DMDP utakaotengeneza barabara za Masaki, Masuriza na barabara ya kilimahewa tuangoma. Na Bilioni Moja Kupitia vyanzo vya TARURA ambapo tutatengeneza toangoma center, mzinga Tasaf kiwango cha zege, malela B, ambazo nazo zimeshatangazwa tunatarajia kuanza kazi mapema hivi karibuni" alisema Mhandisi Masatu

Mhandisi aliongeza kuwa Halmashauri ya Manispaa ya Temeke inatenga asilimia 10% fedha kutoka katika mapato yake ya ndani kila Mwaka kwa ajili ya matengenezo ya Barabara ambapo kupitia fedha hizo zitanufaisha pia kata ya Tuangoma.

"Kupitia fedha za mapato ya ndani zaidi ya milioni 500 tunakusudia kuzileta kwenye kata hii kwa sababu kuna changamoto nyingi, lakini pia tumekubaliana kwenye fedha za manispaa pamoja na chamgamoto za miundombinu kuwa nyingi ila tutahakikisha tutakuwa na matengenezo ya kilomita 5 za barabara kwa kila kata" aliongeza Mhandisi Masatu.

TARURA ni wakala ya Barabara za Vijijini na Mijini ambayo jukumu lake kubwa ni kusimamia ujenzi, ukarabati na matengenezo ya mtandao wa Barabara za Wilaya. Ambapo katika Utekelezaji wa kazi zake kupitia fedha za nje inatarajia kufanya Utekelezaji wa Mradi wa Uendelezaji wa jiji la Dar es salaam (DMDP) utakaoanza hivi karibuni katika Manispaa ya Temeke.