DC Awataka Watendaji Kuepuka Vishawishi vya Rushwa.

Posted on: September 30th, 2019

Mkuu wa wilaya ya Temeke Mheshimiwa Felix Lyaniva amewataka  watendaji wa kata kuepuka kujiingiza katika mambo ambayo yatawashawishi kupokea rushwa.Mhe. Lyaniva ameyasema hayo leo Septemba 30, wakati akilihutubia baraza la madiwani la halmashauri ya manispaa ya Temeke.

Akizungumza wakati wa hotuba yake Mhe. Lyaniva amesema kwamba watendaji wa kata ndio wawakilishi wake katika kata, masuala mengi ya wananchi,  wanayashughulika wao.Kutokana na hilo ,baadhi yao wamekuwa wakishawishika na kushiriki katika vitendo vya rushwa, ikiwemo kuuza maeneo , kusimamia uuzaji maeneo ambayo yameshauzwa, uuzaji wa maeneo ya wazi, na mambo mengine mengi ambayo ni kinyume .

Amesema wao kama viongozi katika ngazi ya kata wanapaswa kufanya kazi kwa kuzingatia maadili ya kazi yao ,na sheria za nchi.Ili kudumisha amani na utulivu ,sambamba na kuhamashisha na kusimamia utekelezaji wa miradi ya maendeleo katika maeneo yao.

''Tujitahidi kufanya kazi bila vishawishi vya rushwa,'' Alisisitiza Mhe. Lyaniva.

Katika hatua nyingine Mhe. Lyaniva amewaelekeza waheshimiwa madiwani pamoja na watendaji kuhamsisha wananchi kujitokeza kujiandikisha ,kugombea nafasi za uongozi na kupiga kura kuchagua viongozi katika uchaguzi wa serikali za mitaa.

Uchaguzi wa serikali za mitaa  utafanyika Novemba 24,2019,ambapo wanachi watachagua wenyeviti wa serikali za mitaa pamoja na wajumbe wa kamati za mitaa.