DC JOKATE AAGIZA VIONGOZI KUWALINDA WATUMISHI WANAOFICHUA MAOVU.

Posted on: February 10th, 2022

Mkuu wa wilaya ya Temeke Mheshimiwa Jokate Mwegelo ameongoza kikao cha kupokea taarifa juu ya mwenendo wa mikopo ya asilimia kumi kwa wanawake,vijana na walemavu ili kutambua na kuzifanyia kazi changamoto zinazokabili mikopo hiyo katika Halmashauri.

Akizungumza katika kikal hicho kilichofanyika Februari 9,2022 katika ukumbi wa Idd Nyundo uliopo ndani ya Halmashauri ya Temeke,Mhe. Jokate  ametoa agizo kwa viongozi wa manispaa ya Temeke kuwalinda watumishi wanaosimamia haki katika utekelezaji wao na kufichua vitendo viovu.

"Ni lazima tuwasaidie na kuwalinda hawa  watumishi wanaoleta  maendeleo na kufichua vitendo ambavyo sio sahihi huku wakisimama kwenye misingi ya haki" alisema Mkuu wa Wilaya

Mheshimiwa Jokate Mwegelo amesema wao kama viongozi wamekula kiapo cha kuwatumikia wananchi na watumishi  hivyo ni vyema kuwa na utu katika utekelezaji wa majukumu yao huku akiwataka viongozi waheshimiane kwa dhamana walizopewa ili kuendeleza Manispaa na Taifa kwa ujumla.

Kwa upande wake Mkurugenzi wa Halmashauri ya Manispaa ya temeke Ndugu Elihuruma Mabelya ametoa rai kwa viongozi na wananchi kuwa waadilifu kwenye mikopo hiyo kuanzia ngazi ya kata mpaka Halmashauri huku akiwataka wanufaika wa mikopo hiyo kurejesha kwa wakati ili kuwapatia wengine wenye uhitaji wa mikopo inayopelekea  kupunguza umaskini kwa wananchi na hasa wakazi wa Temeke.

Mhe. Abdallah Mtinika, ambaye ni Mstahiki Meya wa halmashauri ya manispaa ya Temeke ametoa pongezi zake kwa  watendaji na Mkurugenzi kwa kukamilisha shughuli za maendeleo ikiwemo ujenzi wa madarasa katika manispaa ya temeke na kuwataka viongozi waelewe kuwa changamoto ni sehemu ya kazi hivyo wajitahidi kupambana nazo ili kuendelea kuitangaza halmashauri ya manispaa ya temeke.

Mikopo hii inayotolewa na Halmashauri ya wilaya ya Temeke imekuwa mkombozi mkubwa kwa makundi ya vijana,wanawake na watu wenye ulemavu huku na ni wajibu wa makundi hayo kuzitumia kwa lengo lililokusudiwa.