DC MAPUNDA AFURAHISHWA NA UTEKELEZAJI MKATABA WA LISHE TEMEKE

Posted on: August 17th, 2024

Na:Shalua Mpanda

Mkuu wa wilaya ya Temeke mheshimiwa Sixtus Mapunda ameonesha kufurahishwa na utekelezaji wa mkataba wa Lishe unaotekelezwa katika Manispaa hii.

Akiongea katika kikao kilichojumuisha watendaji wa kata zinazounda manispaa ya Temeke,Mhe.Mapunda amesema pamoja na kufanya vizuri katika kutekeleza Mkataba huo,mikakati zaidi inapaswa kuwekwa ili kuendelea kufanya vizuri zaidi.

"Kwa kweli Temeke tunafanya vizuri zaidi ukilinganisha na nilipotoka,na hili niliweke bayana...kama tunavyofahamu ajenda hii ni ya mheshimiwa Rais,hatuna budi kutilia mkazo suala la lishe".Alisisitiza Mkuu huyo wa Wilaya.

Kwa upande wake Mratibu wa Lishe wilaya ya Temeke Bi.Happy Nkunda akitoa ufafanuzi kwa mkuu wa Wilaya,amesema wamefanikiwa kutimiza malengo ya Mkataba huo kwa zaidi ya asilimia 90 kutokana na ushirikishwaji wa wadau wa Lishe.

Manispaa ya Temeke imekuwa mstari wa mbele kutekeleza Mkataba wa huo kwa kushirikisha Idara mbalimbali za Manispaa hii huku ikiwekeza nguvu katika kutoa elimu ya lishe bora hasa katika shule za Msingi na Sekondari.