DC MAPUNDA ATETA NA WAKUU WA SHULE ZA SEKONDARI, ATOA MAAGIZO

Posted on: January 13th, 2024

Na: Joanita Joseph-TMC Habari

Mkuu wa wilaya ya Temeke Mhe. Sixtus Mapunda leo Januari 13, 2024 amekutana na wakuu wa shule za sekondari wilayani hapa lengo likiwa ni kufanya tathmini ya matokeo ya mitihani ya kidato cha pili iliyofanyika mnamo Oktoba 2023, pamoja na kuweka mikakati juu ya upandishaji wa kiwango cha ufaulu katika mitihani ya kidato cha nne.

Mhe.Mapunda amewataka kuongeza uwajibikaji na kusimamia kikamilifu masuala ya kitaaluma kwa wanafunzi ili kuhakikisha wanafaulu kwa hali yoyote ile.

" mimi siko tayari kuwa sehemu ya watengeneza zero, Mhe. Rais Dkt. Samia Suluhu Hassan ametupa 7 Bilioni sekta ya elimu sekondari nina imani hatarajii zero! Temeke tuna facility nyingi, tuna nafasi kubwa ya kufaulu lakini lazima tuweke dhamira ya dhati". Alisema Mhe. Mapunda

DC Mapunda ametoa siku 7 kwa wasimamizi hao kujitathmini na kuja na mkakati utakaosaidia kuongeza ufaulu katika daraja la kwanza hadi la tatu na kupunguza wingi wa daraja la nne na sifuri (zero) katika mitihani ya kidato cha nne.

"Ninyi ndio moyo na roho ya elimu, nimewaita tujitathmini na tuazimie. Nawapa siku 7 kuanzia leo kila mmoja uje na solution kwa mazingira yako unapinduaje meza kubadilisha matokeo na tuweke mkakati wa wilaya" alisema Mhe.Mapunda.

Kwa upande wake Afisa elimu sekondari Manispaa ya Temeke Dkt. Janeth Barongo amesema amepokea maagizo hayo huku akiahidi kukamilisha zoezi hilo kwa haraka ili kupata mkakati utakaosaidia kuinua sekta ya elimu katika kuondokana na kupata daraja la nne na zero kwa manispaa ya Temeke.

Kikao hicho kilichofanyika katika ukumbi wa Idd Nyundo, Temeke kimehudhuriwa na Mkurugenzi wa manispaa Ndg. Elihuruma Mabelya, waratibu elimu wa kata zote 23 Temeke, Afisa elimu Sekondari Manispaa ya Temeke pamoja na wadhibiti ubora.