DC MATINYI AZINDUA RASMI ZOEZI LA ARDHI CLINIC (HATI PAPOHAPO)

Posted on: September 20th, 2023

Na: Joanita Joseph -TMC Habari

Mkuu wa wilaya ya Temeke Mheshimiwa

Mobhare Matinyi ametoa wito kwa wakazi wa Temeke kujitokeza kwa wingi kwa ajili kuboresha usalama wa milki za ardhi zao ikiwemo kugawiwa hati papo hapo.

Mhe. Matinyi ameyasema hayo leo Septemba 20, 2023 kwenye mkutano wa uzinduzi wa Ardhi Clinic, zoezi ambalo lipo chini ya Mradi wa uboreshaji usalama wa milki za ardhi (LTIP) unaofadhiliwa na Benki ya Dunia chini ya wizara ya ardhi, nyumba na maendeleo ya makazi.

Mhe. Matinyi amemshukuru Mhe. Rais Daktari Samia Suluhu Hassan kwa kutafuta fedha kwa ajili ya kuboresha milki za ardhi nchini na kuwataka Wananchi kutumia fursa hiyo muhimu.

"Mheshimiwa Rais ametafuta fedha kwa ajili ya kuboresha milki za ardhi kwenye maeneo yetu, hivyo Wananchi tutambue umuhimu na tujitokeze kwa wingi, jambo zuri huduma zote zinatolewa kielektronikia unapewa hati yako na rekodi zako zinahifadhiwa kidigitali " alisema DC Matinyi

Kwa upande wake mwakilishi wa mradi Bi. Aisha Masanja amesema kuwa zoezi hilo litadumu kwa siku 25 na litapita kwenye mitaa mitano.

"Tumeanzia hapa Mbagala kuu mashariki, na tutakuwa hapa viwanja vya Zakhiem kuwahudumia wananchi kwa muda wa siku tano, na baada ya hapo zoezi hili litahamia kwenye mitaa mingine ambayo ni Buza, kisewe, Mwembebamia,na Mianzini" alisema Bi. Aisha

Mara baada ya Mkuu wa wilaya kuzindua rasmi zoezi hilo, alikabidhi kwa Wananchi hati miliki zilizoshughulikiwa papo hapo.

Mradi wa uboreshaji usalama wa Milki za ardhi (LTIP) unalenga kutatua changamoto zote zinazokabili urasimishaji ardhi nchini ikiwemo kupanga na kupima maeneo yanayoyohitaji leseni za makazi na hati Miliki, kurahisisha gharama za upimaji, kutoa hati na leseni za makazi pamoja na kuboresha miundo mbinu ya ardhi kwa nchi nzima.