DKT. JANABI AFIKA HOSPITALI YA MBAGALA RANGITATU ASISITIZA MTINDO BORA WA MAISHA

Posted on: November 30th, 2024

Na: Joanita Joseph, TMC Habari

Ikiwa ni siku ya tatu tangu Hospitali ya Muhimbili kwa kushirikiana na Mkurugenzi wa Manispaa ya Temeke ianze kutoa huduma za Ubingwa Bobezi za Uchunguzi na Upasuaji wa macho kupitia tundu dogo bila Malipo kwa Wakazi wa Temeke kupitia Hospitali ya Mbagala Rangitatu leo Novemba 29, 2024 Mkurugenzi Mtendaji wa Hospitali ya Taifa ya Muhimbili Prof. Dkt. Mohamed Yakub Janabi amefika hospitalini hapo kuona huduma zinazotolewa.

Akizungumza na Wananchi waliofika hospitalini hapo kupatiwa huduma, Dkt. Janabi amesisitiza upimaji afya na kuishi mtindo bora wa maisha.

"kila mmoja ajiulize wangapi kati yenu mmekunywa maji lita 1 au 2 kwa siku, mmeweza kutembea hatua elfu 10, mmeweza kula mboga za majani katika kila mlo, mmeweza kulala masaa sita mpaka nane kila siku? Kama hayo hamkuyafata mnategemea kuwa na afya gani? Afya ni matayarisho, muda wa kutayarisha afya ni sasa, badili maisha yako sasa hivi. Mimi kila siku ninaomba Mungu nikiwa na miaka 80 niweze kufanya vitu ambavyo nilikuwa naweza kufanya nikiwa na miaka 60"

Aidha Dkt. Janabi ameishukuru Serikali kwa kuendelea kuwekeza katika Sekta ya Afya na Hospitali ya Muhimbili itaendelea kuunga mkono juhudi hizo.

"Wagonjwa 102 tutawachukua kuwapeleka Muhimbili kwa ajili ya upasuaji, mwakani tutaleta kliniki ya masikio, koo na pua lakini pia tutakuja kufanya kliniki ya wababa tezi dume na niwatoe hofu hatutatumia kipimo kilee...tutapima kwa kutumia damu tu"

Dkt. Janabi amezungumza pia na Uongozi wa Hospitali ya Mbagala na kuwapa Mbinu za kiubunifu zitakazosaidia kuongezeka kwa ukusanyaji wa Mapato katika hospitali hiyo.

Kwa upande wake Mganga Mfawidhi wa Hospital ya Mbagala Rangi tatu Dr. Mussa Makori ameishukuru Hospitali ya Taifa Muhimbili kwa kuwezesha zoezi hilo ambapo Wananchi takribani 445 wameweza kufanyiwa uchunguzi.