"Gala lolote lenye kemikali lisajiliwe na lifahamike" DC GONDWE.

Posted on: December 14th, 2020

Mkuu wa wilaya ya Temeke mheshimiwa Godwin Gondwe ametoa agizo kwa wamiliki wote wa maghala ya kutunzia kemikali Wilayani humo kuhakikisha yanatambulika kisheria kwa kusajiliwa.

Mhe. Gondwe ameyasema hayo wakati akifanya ukaguzi kwenye ghala la kuhifadhia kemikali la kiwanda cha SEIF IMPEX LTD maeneo ya Kisewe, Mbagala jijini Dar es salaam.

Katika ziara hiyo aliyoambatana na Maafisa kutoka taasisi mbalimbali za Serikali kama Baraza la Taifa la Usimamizi wa Mazingira(NEMC),Ofisi ya Mkemia Mkuu wa Serikali pamoja na Shirika la Viwango Tanzania(TBS),Mhe. Gondwe amesema kamwe hatovumilia kuona wananchi wa Temeke wanapoteza maisha kwa uzembe wa baadhi ya watu.

"Tunaendelea kuweka mazingira mazuri kwa wawekezaji Nchini, na wakati huohuo kulinda afya za Watanzania"Amesema mkuu huyo wa Wilaya.Kwa upande wake meneja wa Kanda ya Mashariki kutoka ofisi ya Mkemia Mkuu wa Serikali Bw. Gerald Meliyo amebainisha kuwa katika uchunguzi walioufanya wamegundua kuwa ghala hilo halikusajiliwa kisheria na hata uhifadhi wa kemikali katika ghala hilo haukuwa sahihi.''Wanasema kansa imeongezeka Nchini, kumbe kuna watu wasio waaminifu ambao huzirudisha kemikali ambazo zimeisha muda wake kwenye matumizi ya kawaida kwa Wananchi"Ameongeza Mkemia huyo.

Mwanasheria kutoka ofisi ya Mkemia Mkuu Bw.  Abeid Kafunda amesema sheria zipo wazi na kwa makosa ambayo wameyabaini kwenye ghala hilo,ambapo faini yake inaweza kufikia kiasi cha milioni sitini.Mara baada ya ukaguzi huo mkuu wa Wilaya alitoa maagizo ya kukamatwa kwa wahusika wa ghala hilo na kuwekwa chini ya ulinzi kwa saa 48 na kufungwa kwa ghala hilo mpaka hapo taratibu nyingine za kisheria zitakapokamilika.