Halmashauri ya Manispaa ya Temeke yatoa elimu ya Afya ya uzazi kwa waandishi wa Habari wa Mkoa wa Dar es Salaam.

Posted on: June 14th, 2019

Halmashauri ya Manispaa ya Temeke yatoa elimu ya Afya ya uzazi kwa waandishi wa vyombo mbalimbali vya Habari vya Mkoa wa Dar es Salaam, ikiwataka kupaza sauti katika taarifa zao na kuhakikisha  zinaifikia jamii hususani vijana, ikiwataka waaache kujamiana katika umri mdogo ili wasipate mimba kabla ya wakati.

Hayo yalisemwa na Mkufunzi wa kitaifa wa masuala ya afya ya uzazi kwa vijana Dr.Zuhura Majapa wakati  wa semina hiyo yaliyoandaliwa na Manispaa ya Temeke na kufanyika ukumbi uliopo katika uwanja wa Taifa Jijini Dar es salaam, Dr.Zuhura alibainisha kwamba vijana wengi hawana elimu juu ya masuala ya afya ya uzazi na hivyo kusababisha changamoto ya kuanza mahusiano katika umri mdogo hatimae kupelekea matatizo katika via vya uzazi.

“Tumeona  hali halisi katika nchi yetu ya Tanzania vijana ni wengi katika jamii karibu asilimia 65 ni vijana wa umri chini ya miaka 24 na wanakabiliwa na changamoto nyingi za balehe  hivyo inabidi kuwasaidia kwa kuwapatia elimu stahiki ili kuwakomboa kifikra kuhusu masuala ya afya ya uzazi”Alisema

Dr.Zuhura alibainisha zaidi kwamba vijana wengi wanafanya ngono isiyo salama na wengine wa kike kupata mimba zisizotarajiwa hivyo kuongeza mzigo kwa Taifa kwa kusababisha watoto kulea watoto wenzao na  ongezeko la watoto wasio na makazi maalum.

Nae Dr. Ford Kisongela  Mratibu wa huduma za Afya kwa vijana kwa Manispaa ya Temeke alisema elimu ya afya ya uzazi kwa vijana inatolewa  ili kuwaelimisha vijana na kuwakomboa katika janga la magonjwa hasa  katika umri mdogo, na kubainisha zaidi kwamba elimu hii ni endelevu na  hutolewa bure kabisa katika vituo vyote vya afya vya Manispaa ya Temeke.

“Vijana wengi wanaingia katika umri wa balehe wakiwa hawana taarifa ya namna ya kujikinga kiafya ,lakini wakipata elimu  wanaweza kujilinda na kuvuka salama katika umri huo na kuwaepeusha kupata mimba zisizotarajiwa , VVU sambamba na kuingia katika utu uzima wakiwa tayari wanamatatizo katika afya zao”.Alisema Dr.Ford.

Kampeni ya elimu juu ya masuala ya afya ya uzazi ni endelevu ili kuwafikia vijana wengi wasio na ufahamu wa kutosha kuhusu masuala ya uzazi na namna ya kujilinda ili kuwa naTaifa lenye kizazi kinachojitambua.