JAI YAONGOZA ZOEZI LA UCHANGIAJI DAMU TEMEKE

Posted on: August 8th, 2025

Leo Agosti 8,2025 taasisi ya JAI (Jumuiyatul Akhlaaqil Islamiya) imeadhimisha Wiki ya Taasisi kwa kuendesha zoezi la uchangiaji damu kwa hiari pamoja na vipimo kwa magonjwa yasiyoambukiza tukio lililofanyika katika viwanja vya Zakhem-Mbagala na kuongozwa na Katibu Mkuu wa JAI Taifa, Ndugu Saad Ahmed Salim.

Hafla hiyo imehudhuriwa na wadau mbalimbali wa afya ikiwemo watumishi wa afya kutoka Damu salama na watumishi wa afya manispaa ya Temeke huku mgeni rasmi akiwa Mganga Mkuu wa Wilaya ya Temeke, Dkt. Jonas Lulandala kwa niaba ya mkurugenzi wa manispaa Jomaary Satura.

Akizungumza katika hafla hiyo Dkt. Lulandala ameipongeza JAI kwa jitihada kubwa wanazozifanya kushirikiana na Serikali kuwahudumia wananchi. Alisema

“Tunawashukuru sana JAI kwa kushirikiana nasi kuwasaidia Wananchi. Mmekuwa nasi kwa nyakati nyingi sana, katika huduma za ibada kwa wagonjwa, utoaji wa chakula, na hata huduma za maziko kwa wale wasio na ndugu. Serikali itaendelea kuwaunga mkono katika hayo”.

Aidha, Dkt. Lulandala amewahamasisha Wananchi wa Temeke kuendelea kuchangia damu akisisitiza kuwa hakuna kiwanda kinachozalisha damu, hivyo ni jukumu la kila mmoja kutunza afya ili aweze kuchangia damu salama kwa ajili ya kuokoa maisha ya wengine.

JAI ni taasisi ya kidini inayojihusisha na huduma za kijamii hasa katika sekta ya afya kwa moyo wa kujitolea na mshikamano wa kijamii.